(Reportájem Estajiadu Jornalista Media ONE Timor-Jefriano Lasi)
Oekusi (www.mediaonetimor.co) – Ezistensia média nian atu divulga informasaun sira kona-ba progresu dezemvolvimentu ne’ebé lao hela. Divulgasaun informasaun ne’e tenki lao tuir nia prosesu ne’ebé hatur ona iha lei komunikasaun sosiál.
“Média sira ne’ebé ezesti iha kompremisiu atu divulga informasaun kona-ba progresu iha rai ida ne’e. Rai ketan enklave,Oekusi. Loron-loron imi jornalista hirak ne’ebé destakadu iha Oekusi tenki hatudu imi nia produtu jurnalistiku liu husi plataforma média idak-idak nian.”
Lia fuan hirak ne’e hato’o hosi Prezidente Konsellu Imprensa (KI), Otelio Ote bainhira realiza sorumutuk entre KI ho Jornalista destaku iha RAEOA (Rejiaun Administrativa Espesial Oekusi Ambenu) hosi; Media ONE Timor, Radio Televizaun Timor-Leste (RTTL,Ep), Tatoli,IP, Radio Komunidade Atoni Lifau (RCAL), Lifau Post, Suara Timor Lorosa’e (STL) no média afisiais sira iha Bairu Oeson, Aldeia Sanane, Suku Costa, Sub-rejiaun Pante-Makasar, RAEOA, iha loron, Segunda, (18/11/2024).
Otelio Ote esplika mos kona-ba mandatu KI nian ne’ebé sei remata iha Fulan Fevereiru tinan 2025. Dau-daun ne’e iha hela prosesu preparasaun eleisaun membru KI nian ba periodu 2025 to’o 2029. Hosi orgaun komunikasaun sosiál sei hili reprezentante nain ida. No jornalista sira sei hili reprezentante nain rua. Nain rua seluk sei hili hosi Parlamentu Nasionál. Hamutuk membru KI na’in lima.
Iha parte seluk katak Otelio Ote, KI nian kompetensia sira la halo tuir diretriz ka orientasaun sira podér politika nian, ho respeitu lei ba Konstituisaun no lei hanesan hatur ona iha estatutu KI nian artigu daruak iha númeru dahuluk nian.
Hatuir Otelio Ote, sala hotu-hotu ne’ebé media no jornalista sira halo tenki lao tuir prosesu lei komunikasaun sosiál nian. Inklui, fonte sira iha direitu ba resposta no direitu ba ratifikasaun ba informasaun hirak ne’ebé salah.
“Jornalista no média sira ne’ebé ezesti iha komprimisiu tebes atu divulgasaun informasaun progresu iha rai enklave ida ne’e, loron-loron hatudu sira nia produtu Jurnalistiku liu husi plataforma média idak-idak nian”, Otelio Ote dehan.
Iha parte seluk tuir Jestor Radio Komunikasaun Atoni Lifau, José Francisco Efi katak, agradese ba Jornalista sira ne’ebé maka destaka ona iha Oekusi. Tamba sira sei iha komitmentu atu hato’o sira nia preokupasaun ba presidente konsellu imprensa kona-ba karteira profesionál no mos kestaun balun liga ho institusional sira ne’ebe mak iha Oekusi.
“Ita agradese tamba ohin ita nia presidente konsellu imprensa halo ona anotasaun ba perkupasaun Jornalista nian, destakadu Oekussi. No KI mos sei ko’alia ho ukun na’in sira hodi hare asuntu asesu ba kobertura no produsan,” José dehan hodi hatutan tan’
Tanba nai ulun sira iha Oekusi balun ladun koopera di’ak ho Jornalista. Nai ulun balun la fó informasaun diak ba Jornalista sira. Ne’e sai perkupasaun boot ba servisu profesionalizmu Jornalista sira nian hodi fó sai notisia ne’ebé kredivel.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.