Partidu 5 Hakat Ba PN, Posibilidade Fretilin-CNRT Halo Koaligasaun

MEDIAONETIMOR-Rezultadu apuramentu Eleisaun Parlamentar (Elpar) tinan 2017 ne’ebé asesu to’o, Segunda (24/7), maizu menus madrugada tuku 03:30 OTL rezulta ona Partidu Politiku (Parpol) 5 maka hakat liu bareira 4% hodi reprezenta povu ba tu’ur iha Parlamentu Nasional (PN).

Hosi Parpol 5 ne’e, Fretilin no CNRT maka hetan pursentu diferente iha deit virgula. Parpol PLP nu’udar kompetitor foun konsege kompete hó Parpol tuan, PD hó diferente pursentu ida virgula. Maibé Parpol Khunto maka hetan hó pursentu ki’ik liu hodi dudu ses tiha Parpol tuan, Frente-mudansa.

Hamutuk Parpol 21 ne’ebé kompete iha Elpar 2017 ne’e, Parpol Fretilin iha posizaun dahuluk hó 29,65%, CNRT 29,46%, PLP 10,58%, PD 9,75%. Hosi Parpol 15 sira seluk hetan pursentu zero pontu. Parpol UDT deit maka hetan netik persentazem 1,98%.

Rezultadu persentazem ne’e hatudu katak laiha partidu ida maka manan maioria absoluta hodi atinji kadeira 33 para kaer governu mesak. “Iha kedas Partidu 21 ne’e, hau lafiar iha elisaun 2017 ne’e bele iha manan maioria absoluta,” hateten Premiadu Nobel da Paz, José Ramos Horta hanesan públika tiha ona iha website www.mediaonetimor.com.

Nune’e, dau-daun ne’e públiku hein hela formula koaligasaun hodi kaer ukun iha governu ba periodu tinan 2017 to’o tinan 2022. Maske nune’e, media nasional balun públika ona katak Prezidente Parpol Congresso Nacional Timorençe (CNRT), Kay Rala Xanana Gusmão no Sekretário Jéral Fretilin, Marí Bin Amude Alkatiri kontaktu malu ona hodi, aliende fó parabéns ba-malu, sira mós koalia ona hodi halo koaligasaun forma governu.

Iha parte seluk, hosi observasaun Media One Timor nota katak, Parpol CNRT no Fretilin iha posibilidade bo’ot hodi halo koaligasaun. Tanba, durante ne’e iha kunfiansa barak ona maka Governante periodu 2012 to’o 2017 Partidu CNRT fó ba Fretilin.

Kunviansa hirak ne’e maka hanesan; intrega VI Primeiru Ministru ba Fretilin, fó kunfiansa ZEMS, Apoiu CNRT nian ba Prezidente Fretilin, Francisco Guteres Lu-olo sai Prezidente Repúblika ba periode tinan 2017 to’o 2022 nomos durante kampañe, Fretilin sempre haklili tutuir Xanana Gusmão nia naran.

“Fretilin tenki manan, nune’e Xanana bele manan. Tanba hó Fretilin deit maka Xanana bele dezemvolve Nasaun TL ne’e,” hateten Marí Alkatiri durante kampañe Elpar 2017 nian.

Dau-daun ne’e hosi observasaun Media ONE Timor nota katak, iha, Segunda, (24/07) to’o tuku 11:00 OTL iha Sede CCF laiha aktividade. Militantes Fretilin balun maka hala’o limpeza iha ne’eba. Observasaun hanesan mós halo ba Sede CNRT. Iha ne’eba funsionariu ida-idak, halo nia servisu hanesan bai-bain. Laiha enkontru. No lideransa Parpol nian mós laiha.

Observasaun hanesan halo ba iha uma fukun Parlamentu Nasional (PN). Iha ne’eba, membru parlamentu balun maka tu’ur koalia hodi ida-idak halo nia diskusaun iha fatin salaun plenaria. Maibé, plenaria laiha. Maioria deputadu lamarka preszensa. Iha sekretariadu, funsionari sira hala’o sira nia servisu hanesan bain-bain.(Reportájem Suzana Cardoso)