MEDIAONETIMOR-Hasoru preparasaun intrega poder Primeiru Ministro (PM) iha VI governu ba VII governu, PM Rui Maria de Araújo ba hasoru malu ho Prezidente Repúblika (PR), Francisco Guteres Lu-Olo iha palasiu Prezidensial, Bairo Pite, Segunda, (24/7).
“Hau mai hasoru PR, informa preparasaun VI governu konstituisional atu intrega ba governu foun,VII nian. Iha dokumentus importante balun maka presiza halo deskusaun hó PR antes atu halo relatoriu final intrega nian,” katak PM Rui ba jornalista hafoin remata enkontru hó PR Lu-Olo.
Nia hateten, dau-daun ne’e ministru sira prepara hela relatoriu konaba ministeriu nian para entrega ba titular pasta foun ne’ebé sei tama iha VII governu. Aliende ne’e iha mós dokumentu ida hó naran retratu VI konstituisional ne’ebé sei finaliza semana oin ne’e, sei relata konaba saida maka VI governu halo durante tinan rua hó balun.
Aproveita intervista ne’e PM Rui hodi VI governu konstituisional nia naran fo parabéns ba povu TL tomak hó sira nia matenek hodi hakotu eleisaun parlamentar 2017 ne’e hó paz no dame.
“Rezultadu eleisaun nian hatudu katak eleitores sira hakarak estabilidade governativa. Fó importansia nafatin ba partidus historikus. Ba lider-lider historiku ne’ebé foin forma partidu. Nomos ba joven sira hanesan PD no sira seluk, atu lolo liman hamutuk lori konstrusaun ba estadu hó diak. Hau sujere atu prosesu formasaun governu sei lao ho diak. No VI governu prontu atu entrga governasaun ba VII governu konstituisional,” dehan PM Rui.
Katak Xefi Governu ne’e, iha enkontru hó PR Lu-Olo mós informa ba governu kona-ba reuniaun importante ida ne’ebé sei hala’o iha loron 29 no 31 Jullu 2017. Reunian ne’e bolu dehan Klubu De Madrid.
PM Rui hateten, klubu De Madrid ne’e sei halibur eis Przidente Republika (PR) no Eis Primeiro Ministro iha mundu laran tomak. Reuniaun ne’e sei realiza iha TL. Reuniaun ba reziaun Asia no Ocenia nian, Eis Prezidente no Eis Primeiro Ministro balun mak sei mai partisipa iha reuniaun ne’e.
Topiku importante mak sei koalia kona-ba demokrasia emerzentes ka demokrasia foin moris iha reziaun ida ne’e. Pontu de Vsta TL nian, Eis PR, Ramos Horta nia gabinete maka assume responsabilidade. Maibé, PR Lu-Olo ofisialmente sei halo abertura. (Reportajem Adérito Ximenes)
Ita nia komentariu konaba post ne'e.