Reportajen Jornalista Estajiadu Media ONE Timor-Jefriano Lasi
Oekusi (www.mediaonetimor.co) – Hamutuk uma 12 ahi han mutuk tiha ona no ema na’in rua hetan kanek. Ahi ne’e mai husi ema deskunyesidu sunu rai to’os iha Bairu Kuamna, Aldeia Buki, Suku Usitasae, Sub-Rejiaun Oe-Silo, Rejiaun Administrativa Espesiál Oekusi Ambeno (RAEOA).
Tuir Jornalista estajiadu Media ONE Timor relata husi Oekusi katak, akontesementu ne’e akontese iha loron 13 Novembru 2024 iha maizu menus tuku 16:30 Óras Timor-Leste (OTL). Ahi ne’e mai husi ema deskuñesidu sunu to’os iha Buki. Nune’e daet mai uma komunidade hirak ne’ebé hela besik iha ne’ebá hodi la-konsege hetan salvasaun.
“Ema deskuñesidu sunu rai to’os besik uma komunidade hodi alarga to’o da’et ba uma komunidade nian hamutuk uma 12 no komunidade ho naran Teresa Lafu ho idade 70 no disiente Rosario Punef ho idade 45 sofre kanek kman”, hatete Pontu Fokal Média Officer Autoridade Protesaun Sivil (APC-Sigla Portugues), Cipriano Mesquita.
Iha akontesementu ne’e komunidade sira la-konsege salva riku soin sira iha uma laran. Tuir identifikasaun hosi autoridade lokál sira katak, komunidade la-konsege salva sira nia riku soin mak hanesan; haree, batar, roupa, animál hakiak, belak, morten no osan besik rihun ne’en.
Kona-ba ema deskoñese sunu rai iha to’os ne’e katak autoridade lokál Oekusi liu husi Asesor Asuntu Sosiál, Agustinho Caet hatete, “Ha’u sei hato’o asuntu dezastre ne’e ba Prezidente Autoridade RAEOA, Sr. Rogerio Tiago de Fatima Lobato. Maibé husu mos ba vítima sira atu mantein unidade hodi labele duun malu. Tanba dezastre ita hotu la-espera.”
Iha parte seluk Sefi Suku Usitasae, Tomas Colo Ulan lori komunidade sira nia naran hato’o agradesimentu ba autoridade Oekusi no parseiru sira ne’ebé fornese ona ba vítima insendiu sira. No agradese mos ba APC ba rekopesaun hirak ne’ebé rekolla ona dadus hodi haruka ba nasionál.
“Ami nia esperansa atu iha tempu besik sei iha apoiu ba vítima insendiu sira. Tanba dau-daun ne’e uma kain 12 ne’e laiha hela fatin. Sira mos la-laiha hahan no laiha osan atu bele sustenta sira nia moris loron-loron nian iha tempus badak nia laran”, Tomas Colo dehan.
Hafoin akontesementu, ekipa bombeirus RAEOA to’o kedas fatin akontesementu hodi halo intervensaun liu hosi hamate ahi no salva vítima sira hosi insémdiu.
No iha loron Kinta, 14 Novembru 2024 vítima ínsendiu hetan apoiu lona, Supermi Mie Sedaap, fo’os, basia, no mina bimoli, hosi autoridade Oekusi liu husi asesor asuntu sosiál Agustinho Caet serbisu hamutuk ho parseiru sira, hanesan; APC, reprezenta husi Xefi Gabinete apoiu emerjensia, Amancio da Conceição, koordenador Oekusi World Food Programme (WFP) Ejilo Ulan
Iha serimonia entrega ne’e partisipa mos hosi Kordenador Cruz Vermella Timor-Leste filiál Oekusi Domingos Tapen Cune, Xefi Gabinete Lojistika Sekretaria Rejionál Edukasaun Asuntu no Sosiál Luis Timo, no Xefi Gabinete Finansas Constancio Suni. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.