MEDIAONETIMOR-Hasoru Eleisaun Antisipada (EA) ne’ebé konvoka hosi Prezidente Repúblika, Francisco Guterres Lú Olo, Partidu Aliansa ba Mudansa no Progresu (AMP) anunsia sigla, bandeira no logo foun tuir aprovasaun ne’ebé fo sai ona iha Jornál Repúblika.
Liu hosi konferensia imprensa iha sede Partidu CNRT, Koordenador Komisáriu Komisaun Mídia, Informasaun no Públisidade (KMIP), Mericio Juvinal dos Reis Acara esplika, AMP sei utiliza atributu hanesan sigla, bandeira no logo ne’ebé maka aprova ona.
“Sigla, bandeira no logo ne’ebé maka aprova ona iha konferensia nasional AMP iha loron 22 Fevereiru 2018 no hetan aprovasaun mós hosi Tribunal Rekursu, tuir kedas publikasaun iha Jornál Repúblika iha loron 02 Marsu 2018 ne’e maka sei uza iha EA tinan ne’e,” katak Mericio.
Nia hateten, hosi aprovasaun ba atributu foun ne’e maka tuan sei la-uza. Maibé iha sede sira sei tiding bandeira airin 3, hosi partidu CNRT, PLP no Khunto nian. Ba sosializasaun atributu foun ne’e AMP sei servisu mak’as hodi manan maioria iha EA.
Informa mós ba públiku katak Mericio, liu-liu ba estrutura AMP nivel aldeia to’o nivel nasional para atu hahu uza ona sigla, bandeira no logo ne’ebé aprovadu ona iha ambitu konsolidasaun no mós durante kampanye EA.
Aliende atributu foun hatutan Mericio, AMP mós estabele ona konsellu diretiva ho nia estrutura maka hanesan;
- Konsellu diretiva lidera husi konsellu nain tolu iha komite ezekutivu; Francisco
Kalbuady Lay husi CNRT, Fidelis Mangalhaes husi PLP no José Agostinho hosi Partidu Khunto no sekretariu ezekutivu maka Francisco Guterres.
- Konsellu diretiva forma mós Komisaun 6, ho nia kompozisaun hosi membru Partidu PLP, CNRT no Khunto ba kada komisaun. Komisaun sira ne’e maka hanesan: a). Komisaun ba mobilizasaun massa. Komunikasaun ne’e sei lidera hosi Virgilio Smith, Merita Correia, Luis Roberto da Silva. b). Komisaun téknika no elaborasaun programa, lidera husi Díonisio Babo, Azevedo Marçal no Julio da Silva. c). Komisaun ba asuntu fiskais no kredensial lidera husi Tomas Cabral, Francisco Vasconcelhos, Augosto Mendonça. d). Komisaun ba administrasaun no finansas, lidera hosi Jacinto Rigoberto, Signi Verdial no Kompatriota. e). Komisaun Juridisaun lidera husi Arão Noel, Tiago Sarmento no Lita Abrantes. f). No komisaun ba Media informasaun no publisidade lidera hosi Terezinha Viegas, Mericio Akara no Mario Ximenes.
“Konsellu diretiva ne’e hodi jere programa no politika AMP nian ba preparasaun EA no remata EA to’o tinan 2023,” katak Mericio. (Reportájem Deonisio da Cruz)
Ita nia komentariu konaba post ne'e.