(Reportajen Asistente Editor Marcelino Tomae/Editora Suzana Cardoso)
DILI (Media ONE Timor) — Ukun aan tinan 20 ona maibé Timor-Leste (TL) seidauk iha forsa produtivu ba dezemvolvimentu hodi fó impaktu ba Timoroan haksoit hotu ba rai liur no ema hosi rai liur aproveita osan dollar Amerikanu iha rai laran.
“Ami ko’alia ona kona-ba dezempregu iha rai laran. Sente triste tebtebes, forsa produtivu lori Timor-Leste ba oin laiha. Ita hothotu ho ibun boot ko’alia dehan katak juventude mak futuru ba nasaun. Maibé agora sira nia futuru iha ema nia nasaun.”
Ezisensia ne’e hato’o hosi Xefe Bankada FRETILIN David Dias Ximenes alias Mandati ba Jornalista iha uma fukun Parlamentu Nasionál (PN) iha semana daruak Fulan Jullu 2022.
Xefe bankada Governu ne’e esplika liutan, joven sira ba servisu iha rai liur nia osan la absorve de’it iha rai laran. Tanba, Timoroan sira nadodon ba servisu iha rai liur hodi hatama osan, ema estranjeiru nadodon tama mai rai laran aproveita hodi servisu lori sai fali osan ba rai liur.
Nune’e Deputadu Mandati husu ba Governu koopera malu para responsabilidade ba area hothotu hodi hadia forsa produtivu ba dezenvolvimentu rai laran. Tanba tinan 20 ona TL ukun rasik aan maibé povu nia moris sei iha mukit nia laran.
“Ha’u la’o uitoan iha funu laran. Ita la promote malu. Maibé, povu nia diretu mak mak moris iha uma ne’ebé dignu. Segundu hatais diak. No terseiru mak tenki asesu ba nesesidade sira seluk. Edukasaun ho kualidade diak ba oan sira no saúde di’ak iha rai laran”, katak Deputadu Mandati. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.