MEDIAONETIMOR-Moeda ho denominasaun foun ne’ebé a’as liu kompara ho moeda sira seluk ne’ebé sirkula tiha-ona iha Timor-Leste (TL) sei lansa husi Banco Central de Timor-Leste (BCTL) iha tinan ne’e.
Governadór BCTL, Abrão de Vasconselos lia tu’un ba jornalista liu husi konferénsia imprensa iha sede BCTL, Kinta, (24/08/2017) hateten, Banku Sentrál sei halo lansamentu moeda 200 sentavus iha loron 13 Setembru 2017.
Nia hateten, Moeda foun 200 Sentavus sei sai hanesan moeda ho denominasaun ne’ebé aas liu kompara ho moeda sira seluk ne’ebé sirkula tiha-ona iha Timor-Leste (TL) ho valór ne’ebé korresponde US$2.00.
Hateten Abrão, moeda refere aprezenta imajen karau-timur ida iha natar laran no Foho Matebian hosi kotuk.
“Dezeñu ne’e kontein elementu sira ne’ebé mak parte husi povu Timor-Leste nia istória no kultura. Foho Matebian nu’udar fatin ida ne’ebé espesiál iha ita-nia nasaun nia luta ba independénsia,” dehan Governadór hodi hatutan
Enkuantu, karau-timur no produsaun hare nu’udar sentru iha moris sidadaun timoroan barak. Espesifikasaun ba moeda 200 sentavus mak hanesan; Diametru 25.50mm, Todan 8.46g no Material Núkelo internu: CuNizn no Núkleu externu: CuNi.
Governadór mós introdús ekipa ida husi Banku Sentrál ne’ebé sei vizita munisípiu hotu-hotu hahú husi Kinta-Feira loron 24 Agostu 2017 to’o loron 8 Setembru 2017 atu divulga ba públiku dezeñu osan-besi foun, no esplika kona-ba nesesidade introdús denomination foun no hatán ba pergunta ruma karik iha.
Ho prezensa 200 centavus ne’e maka sei kompleta centavus; 05, 10, 25, 50 no 100 nu’udar moeda Nasaun Timor-Leste. Nune’e, Timor-Leste maka uza moedas 2. Ida maka Dollar Amerikanu no centavus orijinal Timor-Leste nian.(Reportajem BCTL)
Ita nia komentariu konaba post ne'e.