(Reportajem Estajiada Teotonia Neto Ximenes/Editora Suzana Cadoso)
Dili (Media ONE Timor) – Sexta-feira Santa, uniku loron ida ne’ebé iha mundu tomak Igreja la-selebra misa Eukaristia. Maibe selebra de’it Kristu Nia terus, liu husi adorasaun Krus nian. Lee de’it mak Jesus Kristu Nia terus atu husik Jeruzalem iha Pilatos nia eskritoriu to’o iha Kalvariu tutun.
“Ohin Ita hanoin kona-ba Jesus Nia terus. Jesus ne’ebé iha Krus. Aban Sabadu Santa, Jesus ne’ebé mate toba hamutuk ho matebian sira iha rate. Iha Domingu resurisaun, Nia la-hela iha rate. Ita hahii Nia ne’ebé moris hi’as fila fali husi rate, fó esperansa ba Ita sarani hotu. Spesiál ida ne’ebé konvida Ita sarani atu tuir.”
Lia hirak ne’e kasu husi Arsebispu Arkidioseze Metropolitana Dili, Cardeal Don Virgilio do Carmo da Silva, SDB iha ninia homilia antes atu hala’o via Sakra hamutuk ho sarani sira iha Igreja Parokia Santo Antonio Motael, Sexta, (07/04/2023).
Lee Notísia Relevante: Kinta-feira Santa, Jesus Kristu Hatudu Hadomi Malu Hanesan An Rasik
Selebrasaun Jesus Kristu nia terus iha Krus ne’e mak konvida Ita hotu, ba Ita Nia dalan santifikasaun ninian, hatutan Cardeal Don Virgilio, iha Sexta-feira Santa, Ita hahú selebrasaun laiha sinál Krus. No sei taka de’it ho vijilia paskál ninian mak foin halo fila fali sinál Krus.
Dehan Cardeal Don Virgilio, tridaun paskál ninian nu’udar periodu naruk ida. Hahú husi Kinta-feira Santa to’o Domingu resurisaun. Kinta-feira Santa, Ita hanoin kona-ba Jesus Maromak ne’ebé halo an ba ema hodi Nia Oan Nia isin fó mai Ita iha Eukaristia.
Iha Via Sacra ne’e Cardeal Don Virgílio husu ba Sarani sira nia devotu atu reflete hamutuk. Liu-liu kona-ba dialogu entre Jesus no Pilatos. Dialogu ne’e realiza iha refetoriu nia laran. Sira ko’alia kona-ba reinu.
“Iha reinu rua ne’ebé trata iha ne’e. Reinu ida mai husi valor mundu ida ne’e nian ne’ebé oferese. No ida seluk reinu ne’ebé pretense ba sasan Lalehan ninian, mai husi Lalehan. Katak husi ema no husi Maromak”, Cardeal Don Virgílio dehan.
Arsebispu Arkidioseze Metropolitana Dili hatutan, tempu hanesan iha mós iha refetoriu liur. Halibur hela poder politika sira ho poder relijiozu ninian. Poder rua ne’e iha interese diferente.
Maibé Cardeal Don Virgílio dehan, iha momentu dialogu ne’e entre valor mundu no partense lalehan tau hamutuk sira nia forsa ne’ebé hahú impede Jesus Kristu Nia aktividade. Poder rua ne’e seidauk to’o atu simu mundu foun. Reinu foun ne’ebé Ita Nai Jesus Kristu mai atu hari.
Katak Cardeal Don Virgílio, prejensa forsa rua ne’e hakarak konvense Pilatos atu elimina tiha Jesus Kristu husi Nia moris. Husi sira nia istoria. No sira nia planu. Poder ne’ebé preokupa liu ho mundu ne’e ninian bo’ot liu, duke buka Maromak ninian. Poder husi mundu ida ne’e nian mak hanesan forsa violensia no injustisa.
“Maibe Jesus Nia reinu la’os mai husi kriteria no valor sira husi mundu ida ne’e nian. Laos Quirenu no Sejar ni’an. Maibe Jesus Nia reinu hari iha valor sira lalehan ninian leten,” , katak Cardeal Don Virgílio.
Enkuantu iha Via sacra ne’e hetan partisipasaun maximu husi sarani sira, relijiozu no relijioza sira. Responsavel korru no leitores sira, mai husi groupu estasaun Kampung Alor, Bairo Pite no Bidau Lecidere. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.