Dili (www.mediaonetimor.co) – Timor oan na’in 56 sei reprezenta Nasaun Timor-Leste iha kampeonatu desportu Asian Games tinan 2023 ne’ebé sei hala’o iha Hangzhou, Xina, kumprimenta Prezidente Repúblika (PR) Jose Ramos Horta.
Maske jogus Asian Games nia abertura sei hala’o iha loron 23 Setembru 2023, maibé delegasaun TL sei aranka iha loron 14 Setembru 2023 ba grupu dahuluk. No grupu daruak nian, sei aranka iha loron16 Setembru 2023.
Ba Jornalista hafoin remata kumprimenta Presidente Repúplika (PR) José Ramos Horta iha Palasiu Prezidensiál Aitarak laran, Tersa, (12/09/2023), Ministru Juventude, Desportu, Arte no Kultura, Nelio Isac Sarmento hatete, partisipasaun Timor-Leste iha Asian Games ba dala haat ona.
“Partisipasaun Timor-Leste iha jogus Asian Games ne’e ba dala haat ona, inklui jogus tinan 2023. Kada tinan ita sempre aumenta partisipasaun atleta no delegasaun. Nune’e Prezidente Repúblika husu delegadu desportivu sira atu mantein dexiplina hodi hatudu an nu’udar atleta ne’ebé professionál,” katak Nelio.
Nia hateten, delegasaun tinan ne’e fahe ba atleta feto na’in 8 no mane na’in 18. Hamutuk atleta na’in 26. Restu seluk nu’udar delegadu. Atleta hirak ne’e sei kompete iha modalidade 10. Durante jogu maka atleta ne’e lakon, sei fila uluk antes enxeramentu iha jogus Asian Games ne’ebé monu iha loron 08 Otubru 2023.
Katak Nelio, IX Governu konstituisionál fó prioridade liu ba prepara kondisoens rekursu hotu hodi nune’e kontijente TL nian bele ba partisipa iha Asian Games hodi nune’e kontijente TL nian bele ba partisipa iha Asian Games ho di’ak.
“Governo nafatin enkoraja no prepara kondisoens, atu nune’e atleta sira sei ba partisipa jogus refere. Tanba ne’e husu nafatin ba atleta sira atu prepara an ho di’ak. Timor oan ida maka hetan prestasaun ne’e orgullu ida ba Timor-Leste,” katak Nelio hodi hatutan.
Prestasaun atleta iha tinan ne’e bele motiva Timor oan sira ne’ebé gosta Desportu, bele partisipa liu tan atividade desportu nian iha eventu Internasional. PR Ramos Horta husu ba atleta sira atu hatudu dixiplina. Kumpri regra sira hotu husi jogus Asian Games nian.
Akompaña iha serimonia kumprimenta ba PR Ramos Horta ne’e partisipa ne’e mak konfederasaun Desportiva Timor-Leste, komité olimpic nasionál Timor-Leste lori atleta sira ne’ebé atu ba partisipa iha Asian Games Hangzhou Xina komprimenta PR Ramos Horta, molok sira atu ba partisipa jogus Asian Games.
Jogus Asian Games hala’o kada tinan rua dala ida. Ba dahuluk hala’o iha tinan 1959 iha Bangkok, ne’ebé partisipa hosi nasaun 527. No Timor-Leste foin maka hahú involve iha tinan 2003. .(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.