Drag Bike Hamutuk Klase 14 Halai Taru Motor Iha Oekusi

(Reportajen Jornalista Estajiadu Media ONE Timor–Jefriano Lasi)

Oekusi (www.mediaonetimor.co) – Selebra loron proklamasaun Independensia ne’ebé sei hala’o iha loron 28 Novembru 2024 iha RAEOA (Regiao Administrativo Especial Oecusse Ambeno) hamutuk klase 14 maka sei halai taru iha drag bike nian ne’e.

“Ami sente kontenti tebes, tanba hetan oportunidade di’ak hosi Prezidente RAEOA, Sr. Rogerio Lobato hodi mai tuir kompetisaun halai taru motor, drag bike ne’e.   Kompetisaun ne’e hodi selebra loron proklamasaun independensia ne’ebé sei monu iha loron 28 Novembru 2024.”

Lia fuan ne’e hato’o hosi Menejer Maubere racing team, David Proferio da Silva ba Media ONE Timor, bainhira koko hela motor iha area atu halai taru motor nian iha Bairu Sikluli, Aldeia Sanane, Suku Costa, Sub-rejiaun Pante-Makasar, Oekusi, Ambenu.

Halai taru motor drag bike ne’e partisipa hosi klase na’in 14. Ne’ebé nain ida mai hosi Atambua, Indonezia no sira seluk mai hosi Timoroan, ne’ebé feto na’in ida. Kompetisaun halai taru motor drag bike ne’e, hahú iha loron 22 to’o loron 24 Novembru 2024.

David esplika liutan, halai taru motor drag bike ne’e nia objetivu importante liu maka atu anima komunidade sira iha rejiaun Oekusi. No kria amizade metin  liutan entre Timoroan iha ambitu selebrasaun loron historiku ne’ebé nakonu ho sakrifisiu vida Timoroan nian.

Premiu saida maka sei hetan iha kompetisaun ne’e, katak David, “Ami fó fiar boot ba Estadu, Governu no liu-liu autoridade Oekusi nian. Tuir anunsiu ne’ebé anunsia ona, manan nain sira sei hetan  envelope, motor ida ho escooter ida ne’ebé uza gazolina deit.”

Iha parte seluk Joanico Soares da Silva husi tim uala hatete, iha kompetisaun drag bike ne’ebé hala’o iha Oekusi ne’e hodi anima komunidade Oekusi ba selebrasaun loron proklamasaun independente.

“Hau kontenti tebes bele partisipa iha halai taru motor drag bike ne’e. No ami iha esperansa boot bele sai manan nain iha kompetisaun ne’e. Tanba, preparasaun ne’ebé hala’o tiha ona ho maximu tebes”, Joanico dehan.(Asesu Youtube/Facebook https://www.facebook.com/Media1Timor Media ONE Timor)