(Reportajen Asistente Editor Marcelino Tomae)
DILI (Média ONE Timor) – Atu fó oportunidade mundu servisu nian ba lisensiatura Timoroan sira hosi departementu oin-oin para hasa’e tan sira nia abilidade iha mundu realidade nian, nune’e hamutuk kompañia no instituisaun governu 16 fó fatin ba estajiadu foin sa’e hodi halo estajiu.
Programa estájiu foinsa’e ne’e hetan suporta husi; Sekretáriu Estadu Formasaun Profisionál (Sefope), United Nations Developent (UNDP) no COICA. Programa ne’e hahú ona desde tinan 2021. No sei dura durante tinan lima.
Iha tinan 2022 nu’udar etape daruak. Hamutuk lisensiadu na’in 700-resin maka kompete hodi estájiu iha instituisaun Governu nian iha fatin rua no 14 seluk iha Kompañia privadu sira. Maibé na’in 55 mak selesionadu iha tinan ne’e.
Etape atu estajiu hahú hosi loke vaga tuir nesesidade hosi kompañia sira. Selesaun dokumentu no ikus liu tuir intervista iha fatin konkorente sira konkore. No vaga loke de’it ba sira ne’ebé gradua ona iha tinan 2019 ba leten.
Ida hosi Kompañia no instituisaun 16 ne’e maka Kompañia Media ONE Timor, Unipessoal, Lda. Hafoin tuir teste intervista ba vaga 4, hosi konkorente na’in 14. Estajiadu foinsa’e na’in lima maka selesionadu hodi halo estajiu iha Media ONE Timor ho durasaun fulan haat. Durante halo servisu iha mundu real ne’e, estajiadu sira hetan apoiu finanseiru hosi UNDP.
“Ha’u hato’o benvindu ba imi na’in lima. Tanba hetan oportunidade di’ak, hodi mai Ita aprende hamutuk iha Kompañia Media ONE Timor, Unipessoal, Lda. Espera imi nia prezensa bele halo mudansa ba kompañia ida ne’e”, dehan Diretora (Dira) Media ONE Timor, Suzana Cardoso iha serimonia benvindu, Segunda, (21/11/2022).
Esplika Dira Suzana, Media ONE Timor nu’udar kompañia foun ne’ebé harii iha tinan 2013 ho edisaun tabloid. Maibé, tanba krizi politika iha tinan 2018 hapara temporariu. No foin hahú hikas fila fali iha Fulan Juñu tinan 2022, hodi halo públikasaun iha www.mediaonetimor.co no Youtube-POD CAST.
Jornalista señior ne’e hateten, espera durante fulan haat estajiadu na’in lima bele aproveita hodi aplika teoria ne’ebé simu ona durante iha mundu akademika nian. Vaga ne’ebé prienxe mak; Administrasaun no finansa Noviana J.M dos Santos, Média no Komunikasaun iha grafik desain nian Natividade da Cruz, Asistente Informasaun no Teknolojia Edino Martins. No vaga ba Marketing no sales hamutuk na’in rua; Melquiano da Costa ho Abelita Pinto.
Estajiu ne’ebé hahú hosi asina kontratu entre Media ONE Timor ho Sefope, Coica no UNDP ne’e, maioria sei fó apoiu iha parte administrasaun nian. Maibé, parte jornalista nian maioria simu estajiadu sira ne’ebé remata sira nia formasaun iha sentru formasaun Dili laran no estudante universitariu departementu komunikasaun sosiál nian.
“Hetan oportunidade hodi rekruta mai iha Media ONE Timor tanba maioria hosi CV no teste intervista ne’ebé hala’o, hotu-hotu iha kuñesementu kona-ba mundu jornalizmu nian. Tantu hosi elektronik no moos emprimi. Espera esperensia ne’e sei tulun Media ONE Timor hakat ba oin ho suseisu”, dehan Dira Suzana.
Lia fuan orgullu hato’o hosi estajiadu foinsa’e, Melquiano da Costa ne’ebé sei haknaar aan iha Marketing no Sales. “Ha’u kontenti no ksolok boot hetan oportunidade hodi estajiu iha fatin ne’e, hodi aumenta ami nia esperensia iha mundu servisu nian”, tenik Melquiano.
Katak Melquiano, espera durante fulan haat iha mudansa no aumenta tan kapasidade iha area ne’ebé ami estuda tiha ona. Tanba, objetivu husi programa estaziu foinsae ne’e hodi fó oportunidade ba graduadu sira aumenta tan sira nia esperensia servisu.
Hafoin remata sorumutu bemvindu estajiadu foinsa’e na’in lima ne’e, vizita no haree diretamente salaun administrasaun Media ONE Timor nian, Pod Cast no vizita moos kuartu Asosiasaun Radio Komunidade Timor-Leste (ARKTL), Asosiasaun Jornalista Timor-Lorosa’e (AJTL). No hatudu moos fatin ba estajiadu sira atu tuur hodi halo sira nia knaar. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.