(Reportajen Maria Sandrawati-Guilhermino Ramos/Asistente Editor Jacinto Caet)
DILI (Media ONE Timor) — Atu fó koñesimentu ba komunidade moris saúdavel, maka hamutuk estudante na’in 57 husi Instituto Ciencia da Saude (ICS), Departamentu enfermajem sei hala’o sensibilizasaun iha Munisípiu Bobonaro.
“Ami aloka estudante turma ‘F’ hamutuk na’in 57, husi departementu enfermajem mak sei arranka ba Maliana. Sira sei halo sosializasaun hodi fó koñesimentu no hasa’e komunidade ninia koñesimentu iha setór saúde, liu hosi moris saudavel.”
Lia fuan ne’e hato’o husi Vise-Reitor ba asuntu estudantil no alumni, Herculano Dos Reis ba Media One Timor iha kampus ICS Komoro, Kinta, (30/06/2022).
Nia esplika liutan, antes ne’e estudante husi departementu lima koloka ona ba munisípiu; Manufahe, Ermera, Viqueque no Bobonaro. Sira hala’o progarama ne’ebé hanesan iha area remotas.
Sosializasaun para estudante farmajem bele kapasita sira nia aan moris iha sosiadade ne’e katak Herculano, fulan oin husi departementu parteira mak sei ba hala’o sosializasaun. Programa ne’e sei hala’o kada tinan.
Nia hatutan, programa ne’e hetan apoiu husi Organizasaun Não Govermental (NGO) no kompañia balun tuir sira nia kapasidade. Apoiu ne’e hodi fasilita estudante sira iha programa sosializasaun ne’e.
Iha fatin hanesan komisaun organizadora, Estudante Luizinha Soares hateten, antes ba halo sosializasaun, hala’o uluk survei ba fatin. Hafoin haruka karta konvite ba autoridade lokál sira hodi halo preparasaun.
“Karta konvite ne’e hodi husu autorizasaun hosi autoridade lokal ka parte eskola no komunidade sira ne’ebé hakarak simu estudante ICS hirak ne’e”, katak Luizinha hodi hatutan materia sosializasaun preparadu ona.
Estudante ne’e esplika, materia hirak ne’ebé atu sosializa ba komunidade mak hanesan; oinsá sidadaun bele prevene aan husi moras; ISPA, Diareia, HIV-SIDA no Hipertensaun.
Estudante na’in 57 ne’e katak Luizinha sei fahe ba groupu hodi ba iha aldeia tolu iha Suku Ritabou, Postu Administrativu Maliana, Munisípiu Bobonaro. Sistema sosializasaun sei hala’o ho esplikasaun direta no hala’o moos ho sistema tama uma sai uma (door to door).
“Ami garantia programa ne’e sei lao ho suseisu, tanba halo ona preprasaun masimu. Inklui, oinsa atu hasoru komunidade no estudante sira, bazeia ba materia ne’ebé fahe tiha ona ba groupu. Balun ba eskola sekúndaria, pre-sekúndaria, ensinu báziku no balun seluk sei tama uma-sai uma”, hateten Luizinha.(Asesu Youtobe/Facebook Media One)
Ita nia komentariu konaba post ne'e.