(Reportagen Estajiada Media ONE Timor Nuryanti Fatima)
Dili ( Media ONE Timor ) – Nu’udar agradesementu ba apoiu sosiál husi VIII Governu Konstituisionál ne’ebé lidera husi Prezidente Partidu Politika PLP (Partidu Libertasaun Popular) atuál Primeiru Ministru (PM) Taur Matan Ruak maka groupu balun deklara fó votu ba PLP.
“Tanba durante ne’e Prezidente Partidu PLP Taur Matan Ruak nia ukun, fó ona apoiu tomak ba povu nia nesesidade baziku. No ami agradese ba PLP ne’ebé hatudu ona estabilidade politika mai ami povu Timor laran tomak hodi moris hakmatek durante ne’e.”
Hateten Porta Voz Grupu Logoa Tasi Tolu, Joanina Correia de Lasale ne’ebé hetan akompaña husi Vise Prezidente Komisariu Politika Nasional (CPN sigla Portugues), Antonio Freitas, liu husi konferensia imprensa ne’ebé hala’o iha sekretariadu PLP Vila Verde Dili, Kinta, (21/04/2023).
Lee Notísia Relevante: Kampaña Elpar 2023, Funsionamentu PN Limite
Deklarasaun fó votu ne’e mai husi grupu balun iha Lagoa Tasi Tolu, Becora, Vera Cruz, Cristo Rei no balun seluk mai husi Dom Aliexo ne’ebé kompostu husi Partidu CNRT (Congressu Nacional para a Reconstrução de Timor-Leste) no militante PD (Partidu Demokratiku).
Porta Voz Grupu Logoa Tasi Tolu Joanina Correia de Lasale deklara, sira agradese ba VIII Governu Konstituisionál, lideradu husi PM Taur Matan Ruak ne’ebé fó apoiu sosiál ba inan isin rua, bolsa kbi’it la’ek, veteranu sira, bolsa estudu ba estudante milioramentu no fó apoiu sosiál moos ba grupu defisiente sira.
Lee Notísia Relevante: Dignifika Povu Nia Moris, PD Inisia Kampaña Elpar 2023
Hatete Joanina, sira deklara fó votu konfiansa iha eleisaun parlamentar ne’ebé sei hala’o iha loron 21 Maiu 2023 ne’e, para apoiu Taur Matan Ruak kontinua lidera Governasaun periodu tuir mai, nune’e nafatin hala’o programa apoiu sosiál ne’e.
“Ami militante CNRT no PD apela ba kompañeiru, kolega no maluk sira hotu atu mai, Ita hotu hamutuk fó apoiu hodi vota ba Prezidente Partidu PLP, Taur Matan Ruak iha loron 21 Maiu 2023. Vota ba mudansa, vota ba moris di’ak, Timor-Leste tenke ba Oin”, katak Joanina ho lian solisitasaun.
Lee Notísia Relevante: CNE-PNTL Garantia Seguransa Ba Kampañia Elpar
Hatan ba apoiu votus ne’e, Vice Prezidente Komisariu Politika Nasionál (CPN Sigla Portuges) PLP, Antonio Freitas lori Prezidente PLP nia naran hato’o agradese ba apoiantes hirak ne’ebé deklara fó apoiu ba Jenerál Taur Matan Ruak iha eleisaun parlamentar tinan 2023 ne’e.
“Liu husi Ita boot sira nia votu konfiansa ne’ebé deklara tiha ona, espera iha loron 21 Maiu sei sai hanesan baze fundamentál hodi hatudu ba komunidade internasionál katak, Ita Timor-Leste hatudu Ita nia maturnidade politika”, dehan Antonio.
Lee Notísia Relevante: Garantia Transparansia Elpar, CNE Lansa Plataforma Tabulasaun Dijitál
Asuntu prinsipál katak Antonio, maka ida-idak fila fali ba ninia fatin hodi halo exersisiu politika iha bairu, aldea to’o ida-idak nia suku hodi kontinua mantein votu. No mantein estabilidade politika.
“Tenke evita violensia no evita konfrontasaun hodi mantein paz. Mantein estabilidade nu’udar Ita nia komprimisiu durante prosesu kampañe. No moos labele ba insulta ema. Labele ataka ema nia pesoál. Labele halo konfrontasaun iha públika”, hameno Vice Prezidente CPN ne’e.
Lee Notísia Relevante: Apoiu Partidu Fretilin, L7 Lakon Pozisaun Iha PLP
Hanesan hotu-hotu hatene, hafoin remata kargu nu’udar Prezidente Repúblika ba dala III iha tempu ukun an, Jenerál Taur Matan Ruak harii Partidu Politika PLP ne’ebé ikus mai hamutuk hamutuk ho CNRT no KHUNTO halo koaligasaun Aliansa Maioria Parlamentar (AMP).
Lee Notísia Relevante: Luta Ba Dezempregu, Partidu Os Verde’s Simu Tan Militante
Husi koaligasaun ne’e maka foti Jenerál Taur Matan Ruak ba PM. Maibé la-to’o rohan, AMP nakfera. Partidu politiku CNRT sai hanesan opozisaun, maibé KHUNTO no PLP ba hamutuk fali ho partidu politiku Fretilin kontinua Governa VIII Governu Konstituisionál to’o notísia ne’e públika. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.