DÍLI (Media ONE Timor) – Impasse politika ne’ebé naruk, desde tinan 2017 to’o tama tan ho pandemia Covid19 halo Kompaña Díli Post tenki hapara temporariu traballador nain 10, husi nain 25 ne’ebé maka antes ne’e servisu desde inisiu.
“Uluk Díli Post iha trabalhador nain 25. Maibe agora hela deit trabalhador nain 15. Tamba liga ho impase politika ne’ebé naruk tebes. Entaun Kompaña Díli Post labele hetan fundus ne’ebé maka barak, hodi selu trabalhadores sira.”
Perkupasaun ne’e hato’o husi Xefi redasaun Díli Post, Cristovao da Costa wainhira simu vizita formandu Centro Formação Téknika Comunicação (Ceftec) ne’ebé akompaña husi Formadora Ceftec Unidade hakerek imprensa, Suzana Cardoso iha sala redasaun, Sesta, (02/10/2010).
Sefi Redasaun Díli Post, Cristavao esplika, Díli Post lansa iha Fulan Otobru 2019 husi jornálista nain walu ne’ebé antes ne’e servisu iha Diáriu Timoroman. No nain ba Kompaña Divita, nu’udar mós Diretor Díli Post, Fernando da Silva maka investe osan.
Haktuir Cristovao, prosesu servisu jornálista iha Diáriu Díli Post hanesan ho jornál sira seluk. Sirkulasaun servisu la kotu. Durante óras 24. Hahu ho iha dadersan halao enkontru ba planu kobertura. Parte negosiu husi sirkulasaun nian ba fahe no fa’an jornál.
Aliende ne’e hatutan Cristavao, husi parte públisidade mós ba buka públisidade. Hafoin mai kontinua relata públisidade hirak ne’ebé hetan. No entrega públisidade ba parte lay out hodi deseñu. Iha lorokraik halo enkontru editorial.
Cristavao dehan, editor sira edit notísia to’o kalan. Lay out sira hahu deseñu públisidade. To’o notísia edit hotu, lay out kontinua deseñu notísia to’o remata, haruka ba parte emprimi nian hodi emprimi iha makina Díli Post nian. Hafoin husi sirkulasaun mai hikar jornál iha madrugada to’o dader tuku 06:00 ÓTL lori ba fahe ba kliente sira.
Tuir Cristavao, servisu iha jornál todan teb-tebes. Maibé situasaun ekonomia iha Timor-Leste (TL) la suporta ba servisu todan ne’e. Osan la sirkula. Emprezariu no Governu la monta públisidade. Komunidade la gosta le’e jornál.
“Nune’e, Dili Post ne’ebé antes ne’e iha 350 exemplar. Ho impasse politika ne’ebé hetan tan suporta husi Pandemia Covid19 halo kliente barak maka hapara langganan. Krizi financa aumenta liutan ba média emprimi ho ezistensia internet. Nune’e Díli Post agora hela deit 150 exemplar,” katak Cristavao.
Nia esplika, husi problema ne’ebé maka akontese halo Díli Post lahetan reseita, hodi selu salariu traballador sira. Inklui jornálista. Maka kompaña foti desijaun hodi hapara servisu nain 10, ne’ebé servisu desde inisiu.
“Maibé sira nain 10 ne’e hapara temporariu deit. Hafoin situasaun ekonomia normal hikas fali, sei bolu fali hodi kontinua sira nia servisu iha Díli Post. Maske sira lakohi mai servisu, ne’e kestaun seluk. Obrigasaun husi Kompaña nian maka tenki bolu fali sira,” tenik Cristavao ne’ebé fundador mós ba Diáriu Díli Post ne’e.
Hatan Formadora Ceftec Unidade Hakerek Imprensa, Suzana Cardoso konaba relasaun Diáriu Díli Post ho média ofisiais iha ministeriu no sekretariu estadu sira, Cristavao dehan, durante ne’e lao diak.
“Maske iha relasaun diak ho ministériu no sekretáriu estadu sira, maibé ho númeru servisu nain ne’ebé maka ki’ik, dala barak komunika deit ho média ofisiais sira para bele fo informasaun detallu,” hatan Cristavao.
Hateten Cristavao, jornálista sira destaka deit ba iha; Parlamentu Nasionál, Palasiu Prezidente Repúblika no Palasiu Governu nomos tribunal. Fatin hirak ne’e la husik mamuk. Jornálista tenki ba iha ne’eba hodi rekolla informasaun para hakerek iha notísia.
Cristavao hateten, maske sira nia numeru traballador ki’ik, maibé ba futuru sei hadia para bele rekolla informasaun iha munisipiu hotu-hotu. Tamba, daun-daun ne’e informasaun barak liu maka rekolla iha Kapital Dili deit.
Antes remata, formandu sira vizita sala redasaun no fatin emprimi jornál. Xefi redasaun Cristavao esplika, Díli Post sei falta rekursu operasional makina emprimi jornál nian. Timoroan sira barak maka haruka mai estájiu hodi aprende, maibé besik fulan 10 ona seidauk iha kapasidade hodi emprimi jornál.
Iha parte seluk formanda husi Camara Comerçio Industria Timor-Leste (CCI-TL), Julia Guterres Fernan, apresia ho traballador iha média emprimi. Todan teb-tebes. Hahu husi jornálista mai to’o emprimi. Tenki le’es matan to’o rai dader.
“Haré hanesan surat tahan a’at ida, maibé jurnál ne’ebé ita kaer ne’e, liu husi prosesu ne’ebé naruk. Servisu todan duni. Jornálista tenki produs notísia ho kualidade. Nune’e, jurnal ne’ebé produs labele soe saugate deit. Nune’e uza hodi le’e, hanesan surat tahan importante ida,” katak Julia.
Hatutan Formadora Ceftec unidade hakerek imprensa, Suzana, nu’udar média ofisiais sira mós tenki tulun jornálista ho fó atendementu diak ba sira. Fornese dadus. Nune’e, notísia ne’ebé jornalista produs bele iha kualidade ne’ebé a’as.
“Informasaun ne’ebé produs kuandu laiha dadus, hanesan informasaun ne’ebé nakonu ho hoax. Servisu públiku laiha transpararensia ba públiku. Ita dehan ha ses a’an husi hoax, maibé fontes TL fo sai informasaun ho hoax deit,”tenik Suzana.(Reportájem Laila Gomes/Pascoela Soares-Editor Suzana Cardoso)
Ita nia komentariu konaba post ne'e.