(Reportajen Estajiada Media ONE Timor-Ermelinda Colo)
Oekusi (www.mediaonetimor.co) – Hamenus malnutrisaun ne’ebé tinan ba tinan aumenta ba bei-beik maka Ministeriu Saúde servisu hamutuk ho Pathership for Human Development (PHD) fornese ai-han nutritivu ba labarik na’in 101, inan isin rua na’in 10 no inan fó susu labarik na’in 15.
“Programa ida ne’e atu bele hamenus malnutrisaun ba labarik sira iha Suku Lifau (Suku Lifau, Sub Rejiaun Pante Makassar, Oekusi-Ambeno-Red), ne’ebé involve aldeia tolu maka hanesan; Aldeia Nefoba l, Oemolo no Aldeia Tula’ika.”
Hatete Sekretaria Rejionál Saúde Pante Makassar, Oekusi, Luís de Jesus Neno iha nia intervensaun bainhira hala’o serimonia abertura distribuisaun ai-han nutritivu ba labarik, inan isin rua no inan fó susu bebé durante Fulan Setembru to’o Fulan Otobru tinan 2024 iha Suku Lifau, semana dahuluk fulan Setembru tinan 2024.
Hatete Luís, programa fornese ai-han nutritivu ba sira ne’ebé malnutrisaun ne’e hetan suporta husi Governu no PHD. Programa ne’e atu bele hamenus malnutrisaun ne’ebé identifika barak liu iha aldeia tolu ne’ebé lokaliza iha Suku Lifau.
Luís esplika, fornesementu ai-han nutritivu ne’e sei hala’o avaliasaun kada semana rua dala ida. Iha prosesu avaliasaun ne’e sei tetu todan no sukat liman. Nune’e bele hatene rejultadu mudansa ba labarik sira nia progresu isin lolon husi konsumu ai-han nutritivu ne’ebé fornese ne’e.
“Karik iha mudansa tenki kontinua ho programa konsumu ai-han lokál ba kada uma kain. Objetivu husi kontinuasaun programa konsumu ai-han lokál ne’ebé nutritivu hodi sira bele hetan nutrisaun di’ak ho inan aman sira, ida-idak kuda iha sira nia to’os rasik”, Luís dehan.
Iha parte seluk tuir Koordenador PHD, Hermino Lelan hato’o sentimentu orgullu bele partisipa iha serimonia abertura fornese ai-han nutritivu ba maluk hirak ne’ebé afeita malnutrisaun. Espera ho tulun ne’e bele ajuda labarik, inan isin rua no inan fó susu bebé bele lori jerasaun futuru Nasaun Timor-Leste ne’e moris saúdavel.
“Ha’u agradese tebes bele partisipa iha programa ida ne’e hodi hare oan no futuru oan sira ne’ebé mak hetan malnutrisaun bele rekopera fila fali. Espera liu husi apoiu ida ne’e bele ajuda oan sira ne’ebé mak hetan isin fraku sei di’ak lalais”, katak Hermino hodi hatutan.
Durante fulan rua, oan isin fraku sira sei konsumu ai-han nutritivu hirak ne’ebé fornese ba sira hodi hetan fali ai-han nutritivu ba sira nia isin lolon. Aliende ne’e sei sai referensia ba sira nia inan aman hodi fó aihan nutritivu ba sira nia oan ho kuda ai-han iha to’os no haki’ak animal rasik. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.