Vientiane (www.mediaonetimor.co) – Marka tan pasu signifikativu ida iha viajen ba integrasaun komunidade Ekonómiku ASEAN nian, maka Timor-Leste (TL) ho laran-haksolok partisipa iha Enkontru Ministru Ekonómiku ASEAN (AEM-Sigla Inglesh) ba dala 56 maske nu’udar observadór de’it.
Hatuir komunikadu imprensa ne’ebé Media ONE Timor simu iha loron Segunda, (23/09/2024) esplika katak, Ministru Komérsiu no Indústria Timor-Leste, Nino Pereira reprezenta Nasaun Timor-Leste hodi partisipa enkontru AEM ne’ebé hala’o iha loron 15 to’o loron 22 Setembru 2024 iha Kapital Vientiane, Lao PDR (Lao People’s Democratic Republic).
Maske nu’udar observador de’it, maibé partisipasaun ida ne’e marka tan pasu signifikativu ida iha viajen TL nian ba integrasaun komunidade ekonómiku ASEAN. No iha enkontru ne’e TL mos partisipa iha diskusaun krítiku sira ne’ebé forma paizajen ekonómiku rejiaun nian.
Aliende ne’e, fornese mos hanoin sira ne’ebé iha valór kona-ba inisiativa sira ne’ebé la’o hela iha ASEAN. Partikularmente iha avansu integrasaun ekonómika rejionál liuhosi akordu komérsiu sasán sira ASEAN nian (Trade in Goods-Lian Inglesh), progresu ba akordu kuadru ekonomia dijitál ASEAN no progresu importante sira kona-ba Komérsiu iha Servisu, Investimentu no área kooperasaun sira seluk tan.
Sorumutu sira ne’e mós oferese oportunidade atu envolve iha diskusaun sira kona-ba dalan adezaun Timor-Leste ba ASEAN. Timor-Leste hato’o nia agradesimentu ba Estadu-membru ASEAN no Sekretariadu ASEAN nian apoiu no asisténsia ne’ebe kontinua bainhira ita-nia prontidaun tékniku adezaun ba ASEAN hetan ritmu.
Sei nafatin husi Komunikadu Imprensa nian katak, TL mós halo konsultasaun ho parseiru diálogu ASEAN nian inklui Estadus Unidus, Japaun, Xina, Austrália, Nova Zelándia, Repúblika Korea, Índia, Reinu Unidu, Kanadá no seluk tan. Konsultasaun hirak-ne’e subliña sentralidade ASEAN nian ba ekonomia globál, no aprezenta oportunidade ida atu forma kooperasaun ekonómika, kolaborasaun no koordenasaun.
Iha oportunidade ne’e, Ministru Komérsiu no Indústria, Nino Pereira hato’o apresiasaun ba Lao PDR nia lideransa. No ospitalidade ne’ebé di’ak hodi sai uma nain, organiza Sorumutuk AEM ba dala 56 no sorumutuk sira ne’ebé iha relasaun. Lao PDR nia lideransa durante tinan prezidénsia ne’e asegura ona realizasaun sira iha ajenda ekonómika ne’ebé sei kria impaktu ba dékada sira tuirmai.
Ba futuru, TL prontu atu habelar ninia envolvimentu iha programa serbisu iha ámbitu Ministru Ekonómiku ASEAN nian iha Malázia nia Prezidénsia iha tinan 2025. TL fiar katak Malázia nia lideransa sei orienta ASEAN ba realizasaun sira seluk no dezeja susesu ba Membru ASEAN hotu-hotu. Ba estadu membru sira bainhira serbisu hamutuk sei lori ekonómika prosperidade ba malu.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.