Governu Sei Lansa Bolsa da Mae Ba Jerasaun Foun

(Reportájen Jacinto Caet/Editora Suzana Cardoso)

DILI (Média ONE Timor) – “Iha tempu badak VIII governu konstituisionál sei lansa Bolsa da mae ba jerasaun foun,” hateten Pimeiru Ministru (PM), Taur Matan Ruak ba Jornalista hafoin remata enkontru semanál ho Prezidente Repúblika (PR), José Manuel Ramos Horta iha Palacio Prezidente Aitarak Laran, Kinta (09/06/2022).

Tuir PM Taur, nia sente kontente tebes ho PR Ramos Horta ne’ebé aseita no mós sei ko’alia ho parseiru dezenvolvimentu sira atu haree ba atividade governu nian ne’e iha rai-laran.

PM Taur informa, Ministra Solidariedade Sosiál no Inkluzasaun, Armanda Berta dos Santo aprezenta bolsa da mae ba jerasaun foun ba ministru presidénsial konsellu ministru, Fidelis Leite Magalhães katak iha tempu oin sei halo lansamentu.

“Ohin ami (PR Ramos Horta ho PM Taur-Red) ko’alia Bolsa da Mae ba Jerasaun foun nian. No iha tempu oin sei lansa. Konsellu ministru simu ona aprezentasaun husi Vise-Primeiru Ministru no Ministru solidariedade sosial no inkluzaun”, hateten PM Taur.

Katak PM Taur, atu dezenvolve nasaun ba oin presiza esforsu makaas hodi asegura estabilidade politíka governu Timor-Leste nian hodi esploka liutan, “Esperénsia tinan 2017 to’o tinan 2020 laiha mudansa. Lori ita nia nasaun ba fali kotuk, durante tinan hitu nia laran”, dehan PM Taur Matan Ruak.(Asesu You Tube/Facebook Media ONE Timor)