(Reportajen Jornalista Baukau Tomas Reis/ Editor Asistente Marcelino Tomae)
BAUKAU (Média ONE Timor) — Hamutuk idozus na’in 15.536 ne’ebé validu iha Munisipiu Baukau sei simu osan ho montante 4,660,800 USD, ne’ebé fahe direta hosi Banku Nasionál Komersiu no Indústria Timor-Leste (BNCTL-sigla Portugés).
“Tuir kalendáriu ne’ebé produs ona, komesa loron 07 Jullu 2022 hahú ona fahe osan ba idozus sira iha Baukau nian. Pagamentu ne’e sei hahú hosi Postu Administrativu Baukau-Vila Suku Gariuai, tuir mai Postu Venilale, Vemase, Baguia, Laga no remata iha loron 23 Setembru 2022 iha Postu Kelikai.”
Esplikasaun ne’e esplika hosi Diretor servisu Sentru Solidaridade Sosiál no Inkluzaun (SSSI) Munisípiu Baukau, Guido Ricardo Belo iha kna’ar fatin Vila-Nova Baukau, Kuarta, (06/07/2022).
Idozus ne’ebé validu hamutuk na’in 15,536 ne’e katak Guido, kada idozus sei hetan 300 USD. Osan ho total 4,660,800 USD ne’e sei fahe direta hosi Banku Nasionál Komersiu no Indústria Timor-Leste (BNCTL-sigla Portugés).
Diretor SSSI ne’e esplika liutan, lista ba benefisiariu idozus no inválidu parte SSSI munisípal simu ona hosi BNCTL sukursál Baukau. Lista ne’e sei distribui ba postu administrativu sira no sei kontinua distribui ba kada suku hodi hein pagamentu.
Diretor Guido halo komparasaun ho tinan 2021, benefisiariu ba idozus inválidu maizu menus 14.000-resin. Maibé tinan 2022 totál idozu no inválidu iha Baukau hamutuk 15.536-resin hosi suku 59.
Maibé proses pagamentu nia sistema tinan 2022 tuir Diretor Guido, sei nafatin hanesan tinan 2021 nian. Mobile bancking sei halo pagamentu direita ba suku sira ne’ebé determinadu ona.
Haktuir Diretor Guido, ba idozus inválidu ne’ebé kondisaun moras. La’o labele, sei halo pagamentu ikus ho evidensia reklamasaun, hafoin remata ona pagamentu ba kondisaun normal sira.
Diretor Guido hateten, prosesu pagamentu ne’e sei hetan monitorizasaun hosi ekipa sentru solenidade sosiál no inkluzaun Munisípal. Hanesan públiku ona katak, osan ne’e sa’e ba 300 USD ne’e, mai hosi kada idozus kada fulan simu 50 USD.
“Husu ba idozus no inválidu foun sira atu mai simu osan tenke lori Bilhete Identidade (BI) hosi notariadu maka bele simu. Maibé ba benefisiariu tuan sei fó toleránsia bele nafatin uza kartaun eleitórial. Tinan 2023, hakarak ka lakohi, hotu-hotu tenke iha Billete Identidade”, ezizi Diretor SSSI, Guido.(Asesu Youtube/Facebook Média ONE Timor)
Ita nia komentariu konaba post ne'e.