Jesus Kristu Naroman Mundu Nian

(Reportajem Formandu Cedtec Luzinha de Jesus)

Dili (Media ONE Timor) – Reflesaun misa ba Domingu da-haat tempu Quarezma iha tinan 2023 nian ne’e,  aprezenta mai Ita nu’udar sarani atu refleta fila-fali katak moris presiza haboot liu tan Ita nia fi’ar iha Jesus Kristu.

“Husu sarani sira atu aprende no moris tuir Jesus Kristu. Iha Evanjellu São João nia hatete, Jesus kura ema matan delek. La’os de’it ema nia isin, maibé moos ema nia klamar. Tanba, tempu Quarezma sarani sira presisa haboot liu tan sira nia fi’ar iha Jesus Kristu.”

Hateten Diretor da Casa São Pedro no  São Paulo  Pe. Miguel Arcanjo iha ninia homilia bainhira prezidi missa da-haat tempu Quarezma iha Seminário Maior Interdiocesano, Fatumeta, Dili, Domingu, (19/03/2023), iha tuku 07:00 dadeer OTL.

Nia esplika liutan, sarani sira presisa hatene. Delek la’os matan de’it ka isin nian de’it. Maibé  delek  espirituál. Ita fi’ar iha Naí Maromak nia ukun fuan sira. Hola fatin iha eukarestia loro-loron. Halo devosaun no reja tersu loron-loron. Maibé ba Maromak Ita delek nafatin. Tamba seidauk hatene Maromak nia servisu iha Ita nia moris.

Katak Pe. Arcanjo, servisu loron-loron ne’ebé  Naí Maromak halo mai Ita sarani sira mak, konsiderasaun Ita bele ko’alia, rona no hare. Funsaun sira ne’e obra husi Maromak hodi Ita moris tuir.

Hanesan Jesus dehan, haktuir Pe. Arcanjo, “Bainhira Ha’u (Jesus-Red) sei iha mundu Ha’u mak mundu nia naroman”.  Maka Pe. Arcanjo husu ba sarani sira atu buka naroman ispirituál nian.  Hanesan iha Domingu loron santo Ita hola parte iha Eukarestia Nai Jesus Kristu nian rasik.

Pe. Arcanjo dehan,  iha tempu Quarezma  Ita tenke halo di’ak. Ita nia kna’ar nu’udar Kristaun ida maka fila fali ba naroman Kristu nian. Naroman ne’ebé hun no rohan la’ek nian ne’ebé Maromak oferese mai Ita.

“Nune’e Ita presisa fó naroman ba malu. Feen ho la’en iha roman ba malu. Inan-aman naroman fó naroman ba oan sira ne’ebé moris iha sosiedade ho  hakbesik an ba Kristu hodi muda Ita ida-idak nia vida ispirituál”, Pe. Arcanjo haktuir.(Asesu Youtube/Facebook https://www.facebook.com/Media1Timor Media ONE Timor)