Dili (www.mediaonetimor.co) – Omenajen ikus ba Maktoban Sua Santidade Papa Francisco husi povu Timor-Leste (TL) sei hala’o liu husi serimónia misa funerál no mobiliza ai-funan, Papa Móvel (Pope Mobile) no Retratu hosi Sua Santidade Amu-Papa nian husi prasa estatua Nain Feto Lecidere ba Tasi-tolu.
Haktuir komunikadu imprensa ne’ebé lee husi Pe. Juvito do Rego no akompaña husi Ministru Administrasaun Estatal (MAE), Tomas Tomás do Rosário Cabral no Komisariu Jeral Pplisia Nasionál Timot-Leste (PNTL), Henrique da Costa katak, komisaun konjunta Governu no Igreja sei hahú mobiliza ai-funan no retratu hosi Sua Santidade Amu-Papa nian sei konvoi ba to’o Tasi-tolu.
Pe. Juvito esplika liutan, Papa móvel (Pope Mobile-lian Inglesh) nu’udar kareta ne’ebé tula sua Santidade Papa Francisco, sei lori ai-funan, lilin no retratu ne’ebé sarani sira oferese ba monumentu Nain Feto Nosa Senhora iha Lecidere, nu’udar sinal domin ba Sua Santidade Papa Francisco sei konvoi to’o Tasi-tolu.
Komisaun konjunta ne’ebé kompostu hosi Governu no Igreja, iha loron-Sábadu, (26/04/ 2025), oras tuku 9:00 dadeer, kareta Sua Santidade Papa Francisco sei hahú husi prasa Estatua Nain Feto Lecidere ba Tasi-tolu,
Komboiu ho nia route husi Lecidere ba Motael, Nunsiatura Apostólika (sei para minutu ida) hodi omenajem iha Nunciatura apostolika-Farol, kontinua husi Motael ba Palásiu Prezidensiál, Fatuhada, Komoro, no konklui iha Tasi Tolu.
Parte ne’e komunidade sira bele asiste iha Estrada tuir route ne’ebe mak iha, hahú husi Lecidere to’o iha Prasa Tasi-tolu.
Iha parte lorokraik, Órgaun Soberanu, Eis Titulares, Membru sira Korpu Diplomátiku no reprezentante sira hosi Ajénsia Internasionál, sei laiha konvite ofisiál no komisaun konjunta (Governo & igreja) prefere atu utiliza veíkulu ho numero matrikula ofisiál nian hodi bele asesu ba área estasionamentu ne’ebé dezignadu ona iha Tasi-Tolu.
Ba sarani sira ne’ebé ho veíkulu privadu, sei para hotu iha tasi-ibun nian nomós Aeroportu Internasionál Nicolau Lobato wainhira parte tasi-ibun Tasi-tolu nian nakonu, wainhira sarani sira husi parte Oeste transporte sei para iha Tibar( Pelican paradise).
Enkuantu, ba mídia sira, komisaun prepara ona fatin ne’ebé dezignadu. Sira ne’ebé hakarak atu hala’o operasaun Drone iha fatin Misa Tasi-Tolu, tenke halo koordenasaun ho komisaun organizadora, atu nune’e bele rejistu. Sei la permite atu utiliza Drone ne’ebé la autorizadu.
Husi biban ida ne’e anúnsiu ba públiku atu labele fiar informasaun falsu husi ema sira ne’ebé mak laiha edukasaun, morál no responsabilidade hodi públika informasaun falsu sira iha média social, hodi hamate espíritu fiar sarani katolika Timor oan hotu atu partisipa ativu iha misa funeral ba Sua Santidade Papa Francisco nian tuir sekuénsia ne’ebé mak hato’o iha leten, tanba ne’e husu ba públiku atu rona de’it komunikadu ka informasaun ne’ebé fó sai husi Komisaun Konjunta (Governu no Igreja).
“Ami hato’o ami nia agradesimentu sinseru ba kooperasaun no apoiu husi parte hotu-hotu hodi garante susesu no solenidade ba eventu signifikativu ida ne’e”, katak Pe.Juvito.( (Asesu Youtube-https://www.youtube.com/@Media1Timor/Facebook- https://www.facebook.com/Media1Timor/Iha moos Kursu Jornalizmu no Lian Inglesh)
Ita nia komentariu konaba post ne'e.