(Reportajen Estajiadu Oktoviano Mala/Edita Asistente Editor Marcelino Tomae)
DILI (Media ONE Timor) — Karreta Estadu ne’ebé monu iha Postu Admnistrativu Laklubar Munisipiu Manatutu hodi rezulta Vise Prezidente Parlamentu Nasionál (VPPN) Deputada Maria Angelina Sarmento ho ninia familia hetan kanek, Governu mak sei hadia.
“Atu hadia ne’e prontu. Tanba ne’e hanesan sasan estadu nian, estadu mak tenke hadia. Tanba ne’e patrimoniu estadu nian. Maibé, sei rona desizaun husi Parlamentu nasionál (PN).”
Hateten Sekretariu Jerál Adjuntu Parlamentu Nasionál João Rui Amaral, bainhira hatan Jornalista iha nia knaar fatin, Tersa, (23/08/2022).
Hanesan públika ona katak, asidente ne’e akontese iha loron Kuarta, (17/08/2022) iha maizu menus tuku 19:00 OTL kalan, bainhira VVPN Deputada Angelina ho nia família halo viajen atu ba Munisipiu Baukau.
Karreta estadu ho sapa matrikula PN 2 ne’e, konduz husi VPPN Deputada Angelina nia katuas oan rasik to’o iha dalan Postu Admnistrativu Laklubar Munisipiu Manatutu maka derepente karreta ne’e halai ses tiha hosi estrada.
Tuir públikasaun ne’ebé fó sai ona hateten, VPPN nia katuas oan kondus karreta hola liuhusi estrada ninin ne’ebé raí mamar hela hodi rezulta karreta baku fila. Iha asidente ne’e rezulta na’in haat hetan kanek. Mak hanesan; VPPN Deputada Angelina sofre moras hirus matan, kanotak no ain rua. VPPN nia; katuas oan hetan sofre iha hirus matan, oan mane hetan kanek iha parte ulun no oan feto nia ain maka bubu.
João esplika liutan, asidente VPPN Deputada Angelina nian ne’e tékniku lojistiku patrimoniu Parlamenut Nasionál (PN) ninian dada sai ona hosi fatin asidente. Maibé, atu hadia karreta ne’e hanesan patrimoniu estadu.
Karreta ne’e patrimoniu estadu katak João, atu hadia hein desizasaun sei sai husi PN. No kareta ne’e tama kategoria faze asidente. Enkuantu kondisaun Deputada Angelina rekoperadu ona. No nia hala’o fila fali servisu.
Maske nune’e hatutan João, karreta Deputada Angelina nian ne’e presiza hadia lalais hodi halo operasaun fila fali hodi politika na’in sira ne’e uza nafatin hala’o sira nia knaar. Tanba daudaun ne’e, VPPN ne’e hala’o ninia servisu uza de’it karreta privadu.
Hatan Jornalista konaba total orsamentu atu hadia karreta VPPN nian ne’e tuir João nia parte seidauk hatene. Hein parte patromoniu Estadu mak sei halo diagnosa ba karreta refere antes hadia.
“Tuir ha’u nia hatene agora dadaun ita nia vise PNN sei uza nia karreta privadu hodi hala’o nia servisu. Tanba karreta Estadu iha PN limitadu tebes. Maibé, karreta privadu ne’ebé VPPN uza ne’e estadu labele selu”, João haktuir. (Asesu You Tube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.