(Reportájen Estajiada Media ONE Timor-Ermelinda Colo)
Oe-cusse (www.mediaonetimor.co) – Antes atu hetan definisaun titularidade direitu ba rai, husi parte terras no propriedade hala’o sensibilizasaun rejime juridiku ba definisaun titulariedade direitu propriedade bens e móveis iha prosesu resolve kazu disputa rai, ne’ebé hala’o iha Suku Costa, Postu Administrativu Pante Makassar, Rejiaun Administrativa Espesiál Oe-cusse Ambeno (RAEOA).
Sensibilizasaun ba dekretu lei numeru 5/2020, loron 06 fulan Fevereiru kona-ba organizasaun no funsionamentu komisaun no propriedade. No lei numeru 13/2017, loron 05 fulan-Juñu kona-ba rejime juridiku ba definisaun titulariedade direitu propriedade bens e móveis ba komunidade iha Suku Costa ne’e, realiza iha salaun sede Suku Costa, Kuarta, (25/09/2024).
Tuir Komisariu terras no propriedade, Romonio Guterres, Diretor servisu terras no propriedade Oe-cusse, Julio Coel no Xefe Suku Costa, Francisco Colo hatete, sensibilizasaun ba dekretu lei kona-ba bens e móveis ne’e hodi esplika kona-ba funsionamentu komisaun terras no propriedade iha kazu disputa (sengketa-Indonesia) rai nian.
Komisariu terras no propriedade, Romanio Guterres, hafoin remata serimonia sensibilizasaun kazu disputa rai, ba Media ONE Timor hatete, atividade sensibilizasaun ne’e realiza tanba pedidu husi autoridade RAEOA.
“Objetivu atu esplika kona-ba funsionamentu komisaun terras no propriedade ba populasaun sira. Liu-liu ba asuntu disputa rai. Tanba komisaun ne’e nu’udar entidade ida ne’ebe implementa lei rai nian”, Romanio haktuir.
Katak Romanio, lei rai nian ne’e hatur mos iha dekretu-lei numeru 5/2020, loron 06 fulan Fevereiru kona-ba organizasaun no funsionamentu komisaun no propriedade. Husi esplikasaun ne’e maka komunidade sira kumpriende kona-ba titlu rai nian ho di’ak maka bele tulun hodi resolve disputa rai ne’ebé akontese barak iha Oe-cusse.
Aliende ne’e Romanio hatutan tan katak, komisaun terras no propriedade esplika mos lei kona-ba bens e móveis. Katak, diploma ne’e hatuur regra sira kona-ba organizasaun funsionamentu no estatutu ba membru sira komisaun rai no propriedade atu oinsa bele rezolve disputa rai.
Lia fuan hanesan mos hato’o husi Diretor servisu terras no propriedade Oe-cusse, Julio Coel hateten, sensibilizasaun matadalan lei hirak ne’e importante. Tamba, durante ne’e diresaun terras no propriedade iha programa servisu nasionál kadastral halo ona levantamentu sistematiku ba rai komunidade.
“Levantamentu sistematiku ba rai ne’e hala’o ona iha suku 18 iha Oe-cusse. Husi levantamentu dadus ne’ebé husi terras no propriedade hala’o ona, rai barak maka ninia statutu sei iha kazu disputa nia laran”, Julio dehan.
Katak Julio, prosesu levantamentu rai ne’ebé hala’o ona ne’e atu prepara ba futuru hodi hetan titulu ba rai. Maibé, iha levantamentu sira ne’e mos kazu disputa rai barak maka akontese. No to’o agora kazu disputa rai ne’e, balun husi diresaun terras no proproedades hala’o ona mediasaun. Maibé, balun seidauk iha solusaun.
Tamba ne’e katak Julio Coel, parte terras no propriedades konvida komisaun mai hodi esplika ho detallu kona-ba dekretu lei rai ninian. Inklui, knaar husi komisaun terras no propriedades nian. Nune’e, hotu-hotu bele iha kuñesementu kona-ba prosesu atu resolve kazu disputa rai.
“Ami bolu komisaun terras no propriedade mai hodi esplika kona-ba dekretu lei rai nianian. Atu nune’e kuandu mosu kazu disputa rai iha komunidade nia leet maka laiha solusaun, ami bele enkamiña ba parte komisaun terras no propriedade. Tamba, asuntu ne’e sira maka bele foti desizaun ba kazu disputa rai nian”, hatan Julio.
Iha parte seluk Xefe Suku Costa, Francisco Colo hato’o ninia sentimentu obrigadu barak ba terras no propriedades ne’ebé fahe ona informasaun ba komunidade iha Suku Costa. Husi informasaun ne’e, komunidade bele ona kumpriende rai ne’ebé sira hela no uza ona.
“Espera husi informasaun ne’ebé fahe ona ne’e, komunidade bele entende ho di’ak kona-ba lei ba rai no propriedade sira. Tamba durante ne’e Suku Costa hetan problema barak liu kona-ba asuntu disputa rai”, Francisco dehan hodi hatutan tan.
Esplikasaun ne’ebé hato’o ona iha momentu ne’e, nu’udar oportunidade ba komunidade sira husi servisu terras no propriedades hodi fó klarifikasaun direita ba komunidade iha prosesu resolve problema disputa rai nian tuir lei ne’ebé vigor iha Timor-Leste.
Hanesan públika ona katak, Oe-cusse nia kapitál maka Pante Makasár. Governu Timor-Leste fó ona statutu ba Oe-cusse nu’udar rejiaun espesiál. Rai ketan Oe-cusse ho nia luan 817,23 km², iha Postu Administrativu 5, iha totál suku 18 no aldeia hamutuk 63. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.