(Reportájen Editora Suzana Cardoso)
Lação (Media ONE Timor) – Komunidade besik 1.242 ne’ebé hela iha Aldeia Taiubu, Suku Lação, Postu Administrativu Atsabe, Munisipiu Ermera ho voluntariamente loke estrada eransa tempu Portugueza nian.
Ba Media ONE Timor Xefe Suku Lasaun Fernando Nunes no Organizador loke dalan ne’e, Ajunto Komandante Esquadra Atsabe Paulus Mateus Cardoso hateten, sira apresia komunidade nia voluntariumente hakarak loke fila fali dalan ne’ebé loke tiha ona iha tempu kolonial Portugueza.
“Hau nu’udar Xefi Suku Lação maka tau matan hela ba atividade voluntariu ne’e, hodi apresia ba inisiativa di’ak hosi komunidade hirak ne’e”, esplika Xefe Suku Lação, Fernando Nunes ba Media ONE Timor, Domingu, (31/07/2022).
Suku Lação, Postu Administrativu Atsabe, Munisipiu Ermera hamutuk iha aldeia haat; Aldeia Taiubu, Atubu, Ayabe no Aldeia Nunumea. Suku Lação nia total populasaun hamutuk na’in 3.494 ho uma kain besik 708.
Entertante Postu Administrativu Atsabe ho nia luan 167,90 km², iha suku 12. Suku Baboe Leten, Baboe Kraik, Batu Mano, Laubono, Leimeia Leten, Laclo, Lação, Atara, Malabe, Obulo, Parami no Suku Tiarlelo.
Komunidade na’in 1.242 ho nia total uma kain besik 255 ne’ebé hela iha Aldeia Taiubu maka hola inisiativa hakarak loke estrada. “Liu hosi sira nia organizador Ajunto Komandante Esquadra Atsabe Paulus Mateus Cardoso mai fó ona kuñesementu ba ha’u nu’udar xefe suku”, katak Xefe Suku Fernando.
Ideia furak ne’ebé hakarak dezemvolve Suku Lação haktuir Xefe Suku Fernando, sempre hetan apoiu no apresiasun. “Ha’u suporta ho prontu apoiu resolve problema ne’ebé iha ligasaun ho rai ne’ebé komunidade balun senti sai vitima”, Xefe Suku Fernando dehan.
Maibé katak Xefe Suku Fernando, komunidade nia servisu loke fila fali estrada ne’ebé loke ona iha tempu Portugueza ne’e ba programa Suku Lação nian depende ba desizaun iha reuniaun komunidade, liu hosi votasaun.
Suku Lação ne’ebé fronteira ho Suku Batumanu no Suku Atara antes tama ba Postu Administrativu Bobonaro ne’e nia estrada hola parte iha estrada nasionál. Maibé tinan ukun an aumenta, estrada públiku ne’ebé eransa hosi Indonezia kumesa at ba beibeik.
“Hau hahú inisia programa loke estrada kilo metru rua ne’e, atu hanorin ita nia komunidade para labele hein de’it hosi Governu. Maibé ho rekursu ne’ebé iha, tenki hahú daudaun hodi bolu atensaun hosi Governu para tau konsiderasaun”, katak organizador Ajuntu Komandante Esquadra Atsabe Paulus Mateus Cardoso.
Ajuntu Komandante ne’ebé nu’udar mós Taiubu oan ne’e esplika, servisu loke estrada hala’o iha loron Domingu hafoin sai misa. Komunidade sira lalin fatuk ne’ebé besik iha bee dalan hodi hada sa’e besik metru ida. Hafoin kee rai besik bee dalan maka ateru.
Katak naran bolu Polisia Mateus, estrada ho luan metru haat ne’e hahú servisu iha semana ikus Fulan Jullu. To’o agora foin servisu atinji 10%. Maibé, ateru ne’e hodi loke dalan ba kareta tama para ajuda lalin fatuk hada sa’e nian.
Konaba uza semente hanesan programa PNDS nian katak Polisia Mateus, hafoin ateru ne’e hotu maka hatama proposta ba Governu hodi tau konsiderasaun ba estrada ne’ebé liga ho komunidade iha Postu Administrativu Hauba, Munisipiu Bobonaro ne’ebé fronteira ho Suku Lasaun iha parte Lorosa’e nian.
Hatan kona-ba loke estrada ne’e sei afeita ba rai komunidade nian Polisia Mateus dehan, “Estrada ne’e uluk tempu Portugueza iha ona. Maibé iha tempu okupasaun Indonezia la utiliza tanba loke fali estrada foun ne’ebé ba to’o de’it iha Suku Obulo. Nune’e bainhira loke fali estrada ne’e rai na’in ho total uma kain 10 kontribui hodi entrega sira nia rai rohan hodi haluan estrada ne’e.”
Tuir observasaun Media ONE Timor iha terenu nota katak, estrada ne’e importante tebes ba komunidade Suku Lação ne’ebé maioria moris hosi hala’o negosiu. Tanba iha Postu Administrativu Atsabe aplika bazar mobile ne’ebé koopera ho Postu Administrativu Hauba hodi hala’o bazar semanal. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.