(Reportajen Guilhermino Ramos-Maria Sandrawati/ Editora Suzana Cardoso)
DILI (Media ONE Timor) – Atendementu ba pasiente ne’ebé maioria moras ispa, kulit, diabetes, struk, diareia, fuan no tensaun menus iha Sentru Saúde Formoza (SSF), maka husu ba ministeriu saúde Munisipiu Dili atu tau konsiderasaun ba problema ne’e.
“Pessoál saúde iha sentru ne’e la sufisiente ba atendementu pasiente sira. Kada loron SSF rejistu pasiente minimu 150, maximu to’o 170. Pasiente hirak ne’e mai ho moras oioin”, Xefi SSF Jaime dos Reis Belo iha nia kna’ar fatin semana kotuk ba Media ONE Timor hateten.
Nia esplika liutan, moras ispa maka domina iha SSF ne’ebé kauza hosi rai rahun hodi fasil atu kona labarik sira ho idade tinan lima mai kra’ik no ferik katuas ho idade tinan 60 ba leten. Aliende moras sira seluk ne’ebé difikulta atu atende tanba menus pesoal saúde.
Nune’e xefi saúde ne’e husu ba saúde Munisipiu Dili atu hato’o problema ne’e ba nasionál hodi extende tan kontratu pessoal saúde espesialista ba saúde publiku sira.
Dehan Jaime, pesoal saúde públiku hamutuk na’in 38. Sira servisu hodi reforsa servisu ministeiru saúde nian iha SSF, tanba SSF iha de’it funsionariu nain 10. Nain ida reformadu. No nain rua seluk ba kontinua estudu iha estranjeiru. Maka, daudaun ne’e hela de’it pessoal saude nain hitu.
Maske hasoru limitasaun pesoal saúde maibé Jaime dehan, durante stock aimoruk laiha, sira nafatin servisu tuir misaun ministeriu saúde nian ho espiritu nasionalizmu hodi fo atendementu ba públiku.
“Lorloron sempre hala’o sensibilizasaun informasaun saúde, nu’udar edukasaun ba komunidade sira. Ami iha SSF servisu hamutuk ho autoridade lokal sira hodi dezamia informasaun ba komunidade. Objetivu para fó atensaun ba sidadaun hotu–hotu oinsa prevene a’an husi moras”. Jaime dehan.
Iha fatin hanesan apoiu vasinator Covid-19, Xefi Quintino Soares de Sousa hateten, moras ISPA sai ameasa bo’ot ba komunidade sira. Maka komunidade tenke kontinua simu vasina Covid-19 pfizer hodi hadok a’an husi moras refere.
“Ami iha matadalan ne’ebé mak antes ne’e komunidade sira simu vasina astrazeneka no Sinovaks doze dahuluk no daruak. No datoluk sei kompleta ho vasina boster Pfizer. Programa vasinasaun ne’e, implementa iha teritoriu, tuir protokolu ne’ebe adota husi organisazaun mundial de saúde”, hateten Quintino ne’ebé la temi dadus klaru populasaun sira simu vasina iha SSF ne’e.(Asesu YouTube/Facebook Media ONE Timor)
Ita nia komentariu konaba post ne'e.