(Reportajen Jornalista Media ONE Timor Iria da Cunha)
Sagadate (www.mediaonetimor.co) – Be’e mos ne’ebé sai perkupasaun ba komunidade husi Aldeia Selagua, Suku Sagadate, Postu Laga, Munisipiu Baukau, hafanu grupu Klibur Estudante Joventude Suku Sagadate (KEJSS), lolo liman hodi fó tulun halo konservasaun ba bee matan hodi fasilita sira nia moris.
Aldeia Selagua rasik, inklui iha Suku Sagadate ne’ebé iha aldeia 11, maka hanesan; Aldeia Abuti, Alasafa, Auraba, Beliuali, Ia Sula, Naha-Afa, One-Bu’u, Samagata, Sire-Bu’u, Ulabuti no iklui Aldeia Selegua.
Iha Aldeia Selegua iha populasaun hamutuk 251 ne’ebé kompostu husi mane 118 no feto 133, maka hela iha aldeia ne’e. No hamutuk uma kain 59 maka hela iha uma hamutuk 58. Aldeia Sagadate mos iha ema difesiensia hamutuk nain tolu.
Ba Jornalista hirak ne’ebé hetan apoiu hosi OXFAM no realiza husi Asosiasaun Jornalista Timor Lorosa’e (AJTL), hodi hala’o atividade media tour durante loron, 09 to’o loron 11 Agostu tinan 2024, responsavel grupu KEJSS, Raimundo Gusmão hatete, ukun an tinan 19 ona maibé komunidade sira sei difikulta ba bee mos.
“Iha tinan 2021, ami hamutuk ho komunidade iha Suku Sagadate halo konservasaun ba bee matan, Itamalari no Bordau ne’ebé lokaliza iha Aldeia Selagua. Bee husi bee matan rua ne’e dada mai halibur hamutuk iha tanki dezerva ho metru 120, kuadradu 6×6 no tanki laran nia luan 3×3 metru”, Raimundo esplika.
Konta Raimundo, nu’udar lider maximu KEJSS ne’ebé eleitu husi kongresu ne’e nia esplika, bee matan ne’e tulun teb-tebes komunidade sira nia moris. Nune’e, hafoin KEJSS konserva tiha bee ba tanki, nafatin fó apoiu hodi fasilita komunidade sira kanaliza bee ba sira nia hela fatin.
Raimundo dehan, bee tanki dezerva husi bee matan Itamalari nafatin hetan tulun husi KEJSS hamutuk ho komunidade hodi kanaliza fali bee ba uma kain ualu. Maibé bee tanki husi bee matan Bordau, mai husi komunidade sira nia inisiativa hodi kanaliza ba sira nia hela fatin. Nune’e hamutuk uma kain 18 maka asesu bee mos ne’ebé tama to’o sira nia uma hun.
“Kanalizasaun bee mos ba komunidade nia hela fatin, sei hafasil ami nia inan feton sira labele ba lalin be’e husi fatin dok. Ho bee ne’ebé naksulin di’ak, sei tulun moos komunidade sira atu aproveita uma hun hodi kuda aihan nesesidade baziku nian”, Raimundo dehan.
Iha fatin hanesan benefisaria, Eujenia da Costa Belo, senti orgullu ba fornesementu bee moos ne’ebé tama to’o sira nia uma hun. Nune’e bele fasilita sira nia moris iha area rural ne’ebé sei falta iha sira nia moris fatin.
“Ha’u agradese tebes ba ami nia oan sira ne’ebé ho inisiativa di’ak hodi ajuda bee mos mai to’o ami nia uma hun. Nune’e, agora ami kuru bee la-presiza la’o dook, kompara ho uluk tenki kuru bee husi uma ba bee matan la’o to’o minutu 30 mak foin hetan bee matan. No loron ida kuru bee dala tolu de’it ho jeregen litru lima. Ne’e todan teb-tebes”, Eujenio deklara. Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.