(Reportajen Estajiada Teotonia Neto Ximenes/ Editor Marcelino Tomae)
Dili (Media One Timor) — Nu’udar fi’ar nain ba relijiun katólika, Sarani hotu-hotu tenke hametin fi’ar iha tempu kuarezma, hodi moris hamutuk ho Kristu iha tempu paskua.
“Kuarezma ne’e Ita moris hias fila fali husi Ita nia hahalok a’at sira. Ita tenke hametin Ita nia fiar hanesan Lazaro ne’ebé mate no moris hias fali husi rate. Maske loron haat ona. Nune’e fó hanoin mai Ita katak tenke haka’as an atu moris fila fali”
Lia hirak ne’e kasu husi Padre Mariano Maia iha ninia omilia bainhira prejide misa ba tempu Kuaresma da haat oras tuku 09:45 dadeer iha Kampal Igreja Parokia Santo Antonio Motael, Domingu, (26/03/2023).
Lee Notísia Relevante: Pe. Justino: “Fi’ar Iha Jesus Kristu Sei Hetan Moris Hias”
Padre Mariano haktuir, tanba fi’ar iha Aman Maromak Jesus halo Lazaro moris hias husi mate. Iha tempu ikus Kuarezma nian Sarani Katólika hotu-hotu, tenke prepara an mate ba hahalok aat iha moris loron-loron nian atu bele hakribi sala sira. Nune’e bele moris hias hamutuk ho Kristu iha tempu Paskua.
Padre Mariano esplika, iha nia omilia, nu’udar fi’ar sarani katólika tama ona ba tempu ikus Kuarezma nian fo hanoin ba sarani la bele sai hanesan ema fiar laek. Labele sira ne’ebe hanoin katak, mate ne’e ikus ba buat hotu. Maibé ema fiar na’in ba Maromak mate nu’udar inisiu ba moris foun rohan laek. Mate pasajen husi mundu ba lalehan.
Lee Notísia Relevante: “Pe. Natalino: “Prepara An Siu Salvasaun”
Tanba katak Padre Mariano, Maromak iha kbi’it Beran tomak bele loke odamatan rate ni’an. loke odamatan mate nian hodi halo ema moris hias.
“Hanesan Ita haree Jesus Kristu hatudu Maromak nia Gloria ba Marta ho Maria ne’ebé triste tanis tan sira nia maun Lazaro mate. Sira sente lakon ema ne’ebé sira hadomi. Sente triste boot. Sentimentu lori Ita ba triste. Tanis lori Ita ba esperansa no ksolok”, dehan Padre Mariano.
Lee Notísia Relevante: “Pe. Joel Casmiro Pinto: Quem Ceiro em Jesus, Mesmo Que Morra Viverú
Tanba ne’e liu husi omilia, Padre Mariano husu ba sarini tomak mai hotu-hotu, ida-idak tanis ba nia sala sira ne’ebé halo hasoru Maromak, nune’e iha tempu Paskua bele lori ba haree Maromak nia Gloria hatudu liu husi sentidu moris no mate.
“Mai ita oferese ba Kristu atu transforma Ita ba hetan Moris foun iha Vitoria moris hias Kristu Nian iha Paskua. Ita oferese moris iha Maromak nia liman atu hafoun no hametin liután fiar ba Maromak iha tempu Kuarezma” dehan Padre Mariano hodi haktuir tan.
Ida ne’e nu’udar tempu paz husi mate tan sala. Mate tan foti an. Mate tan halo an. No mate sira seluk ne’ebé mak sempre iha moris loron-loron.
Enkuantu iha Misa Domingu ba tempu Kuarezma da ikus nian ne’e hetan partisipasaun maximu husi Sarani sira, no moos responsavel koru husi Joven Ba Kristus (JBK). (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.