MEDIAONETIMOR-Hafoin Partidu Libertasaun Popular (PLP) ho Partidu Fretilin la hetan konkordansia iha koaligasaun hamutuk ho Khunto maka dalan ikus dada Partidu Demokratiku (PD) ne’ebé hakarak kolabora hodi asina deit akordu forma VII Governu Konstituisional.
“Ami Sei kumpri vizaun dinamika. Tanba, dinamika partidu 5 ne’e hamutuk atu hateke ba oin. Iha dalan klaran lia fuan la kona malu. Maibé, ita sei hamutuk nafatin,” hateten Sekretariu Jeral Fretilin, Mari Bin Amude Alkatiri ba jornalista liu husi konferensia imprensa iha Salaun Hotel Novo Turizmu, Segunda, (04/09/2017).
Hateten Mari hodi saran lia anunsiu konsulta popular nian katak, ohin loron 4 Setembru loron importante ba rai Timor-Leste (TL) hodi hanoin hikas tinan 1999 bainhira anunsiu rezutadu konsulta popular.
Nune’e mós ohin hotu-hotu hamutuk iha ne’e katak Mari, para hateke ba oin liu husi foti desizaun para bele hametin rai TL. Maka halo komprimisiu Politiku hodi asina akordu ida entre Fretilin, PD ho Khunto hodi garante VII Governu Konstituisional.
“Ami asina komprimisiu politiku ida para depois sei kumpri. Maibé kumpri ho vizaun dinamika. Signifika, agora ba oin dialogu tenki iha nafatin. Laos ho partidu 3 ne’e deit. Maibé, hamutuk ho partidu CNRT nomos PLP iha parlamentu,” dehan Mari hodi hatutan.
Dinamika ne’e laos deit hamutuk ho Partidu 5 ne’ebé tu’ur iha Parlamentu. Maibé sei hamutuk ho sosiadade Timorenses tomak. Inklui; forsas vivas, Igreja Khatolika no ema potensial sira seluk para bele hametin estadu nomos nasaun TL.
“Tempu tranzisaun ba jerasaun foun atu akontese iha tinan 5 ida ne’e nia laran. Tamba ne’e mak hau dehan tinan 5 ne’e krusial. Tinan 5 ne’e importante. No tinan 5 ne’e terminadu ba jerasaun foun,” katak Mari.
Antes hakotu konfrenesia imprensa Sekretaris jeral Partidu Fretilin ne’e, fo obrigadu ba jornalista sira. Tanba fo sira nia tempu durante besik fulan ida resin hodi akompaña prosesu ne’e ho pasiensia.
“No aban, (Tersa, 05/09/2017) iha Parlamentu Nasional (PN) sei realiza tomada de posse. Ne’e premeiru pasu. Tamba tuir mai ita sei presija hadia, hametin, hari’i, habelar no hamos hodi haburas liu tan TL nia futuru,” haktuir Mari.
Komprimisiu Politika Iha PN
Iha parte seluk eis Prezidente Repúblika, José Ramos Horta hafoin remata enkontru ho Prezidente Repúblika, Francisco Guterres Lú Olo iha Palasiu Prezidensial ba jornalista hateten, nia partisipa iha enkontru entre Fretilin, PD no Khunto hodi rona no asiste sira nia komitmentu ba forma VII Governu Konstituisional ne’e nian.
Maibé katak Ramos Horta, Partidu Fretilin, PD no Khunto asina deit komprimisiu Politika ba Parlamento Nasional (PN). No akordu ne’e lao hela. Espera katak bele hetan solusaun ne’ebé maka diak iha Parlamentu no ba iha Formasaun Governu nian.
“Iha loron 15 Setembru 2017, Prezidente Repúblika halo diskursu iha Parlamentu Nasional ba Primeria Sesaun. No iha tempu badak Primeru Ministru deziknadu sei hili nia membru sira hodi forma governu,” tenik Ramos Horta.
Ramos Horta aumenta tan, Politika Fretilin nian ba Inkluzaun. Ne’e siginifika hodi balun hili dalan tama iha Inkluzaun. No balum iha koligasaun.(Reportájem Mario Lobo/Hilario da Silva)
Ita nia komentariu konaba post ne'e.