(Reportajem Estajiadu Media ONE Timor Mario Xavier da Costa Pereira&Marquita Fereitas)
Dili (www.mediaonetimor.co) – Fasilita komunidade iha mundu, inklui Timor-oan sira no moos estudante iha Timor-Leste (TL) atu iha kuñesementu no abilidade kona-ba problema degradasaun meiu-ambiente ne’ebé fó ameasa ba biodiversidade nian, maka Tropical Permaculture (Permatil) TL no Permatil Global lansa livru tropical permaculture guidebook.
“Nu’udar Prezidente Repúblika, prontu fó apoiu ba kulker atividade ne’ebé maka bele fó valor no valoriza sidadaun. Liu-liu ba estudante sira ne’ebé maka hakarak atu aprende liu hosi livru tropical permaculture guidebook ne’ebé lansa tiha ona”, PR José Ramos Horta hatete ba Jornalista hafoin remata lansa livru ne’e iha Palasiu PR Aitarak laran, Sesta, (14/07/2023).
Nia hatete, livru tropical permaculture guidebook ne’e sei sai hanesan materia obrigatoria iha eskola. Nune’e, livru ne’e sei distrubui ba eskola sira iha TL. Estudante hotu-hotu bele adapta tuir nivel edukasaun. Hahú hosi nível elementar to’o universitariu. No sei prepara livru balun iha palasiu PR nia edifisiu.
Aliende sai mata dalan ba TL, hatutan PR Horta, livru ne’e sai moos mata dalan ba komunidade internasionais liu hosi download iha internet. Ema hotu-hotu iha mundu ne’e tenki kuidadu; rai, kuidadu ema no kuidadu futuru hosi degradasaun meiu-ambiente ne’ebé sei fó ameasa ba biodiversidade nian.
Dezde hari’I iha tinan 2001 to’o tinan 2023, Permatil halo ona intervensaun iha area oioin uza konseitu no prátika Permakultura ne’ebé énfaze Étika Permakultura: Kuidadu rai, kuidadu ema no kuidadu futuru. Sistema Permakultura halo aproximasaun ne’ebé olístiku ba moris loro-loron nian. Inklui hela fatin (uma), bee-moos no hahán, saúde, edukasaun no kooperativa, jestaun lixu nian, enerjia no akuakultura, mota, ai-laran, balada fuik no seluk-seluk tan. Sistema permakultura bele aplika iha area rurál too area urbana no sidade.
Iha sikun seluk Diretór Permatil Ego Lemos ba Jormalista katak, livru volume da-toluk ne’e nu’udar tropical permaculture guidebook ho nia titlu Generativu Agrikultura. Livru volume da-toluk ne’e ho total kapitulu sanulu-resin. Antes ne’e Permatil produs livru volume dahuluk livru ho titlu permakultura no ema. Volume segunda mak uma no kintal.
Ego Lemos ne’ebé nu’udar moos artista señior ne;e hatete, livru ho volume da-tolu ne’e ho nia titlu Generativu Agrikultura. Total kapitulu XV no total pajina hamutuk 100 . Volume da-toluk ne’e kover asuntu hotu-hotu ne’ebé Permatil halo ona.
“Dezde harii iha tinan 2002 permatil halo ona ho hahú kedas husi agrikultura, mau ambinte, mau konservasaun prarice. No mos kona-ba agre-floresta, agriperkoaria, no sistema kona-ba ba kua-au’u. No kapitulu ikus ko’alia kona-ba koperativa”, katak Ego Lemos. Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.