(Reportajen Asistente Editor Jacinto Caet)
DILI (Media ONE Timor) — Atu solisita to’os Na’in sira nune’e Timor-Leste (TL) labele depende de’it importasaun ai-fuan husi estranjeiru mak Ministériu Agrikultor no peska (MAP) servisu hamutuk ho Institutu Nasionál Combate (INC-SIDA) kuda ai-oan hun neen iha Suku Tibar.
“Ha’u apresia tebes ba institutu nasional combate HIV-SIDA ne’ebe hakarak solidariza hotu-hotu nia liman ba iha to’os, para bele hasa’e ita nia produsaun ai-fuan, atu bele mos hodi hasa’e ita nia nutrisaun ne’ebe diak ba saude ema nian, atu bele halo kontente ema.”
Dehan vise Ministru MAP, Abilio Xavier de Araujo ba Jornalista hafoin abertura ba kuda ai-oan iha edifisiu Centru Rekuperasaun Saude (CRS) Tibar, Kuarta (13/07/2022).
Vise Ministru ne’e esplika, ai-oan ne’ebe mak MAP oferese ba INC-SIDA hamutuk 50, ohin kuda hun Neen mak hanesan, Has hun tolu, Sabaraka Ida, Rambutan no Kulu ida, ne’e sai hanesan referensia ida ba to’os na’in sira liliu iha Suku Tibar, Postu Administrativu Bazartete, Munisípiu Likisa.
Ministru Abilio dehan, inisiativa kuda ai-oan ne’e husi INC-SIDA oinsa atu dezenvolve ai-horis iha rai laran. Apoiu ai-oan ne’e fo ba Institutu Nasional Kombate (INC-SIDA) atu nune’e hasa’e produsaun ai-fuan iha rai laran nian,
“Agora atu hasa’e produsaun rai laran, ita tenke servisu hamutuk ho ministeriu relevante sira para atu bele konsentra lisuk ba iha produsaun rai laran ho rai ne’ebe mak giji aas”, tenik nia.
Governante ne’e informa, inisiativa husi Institutu refere ne’ebe mak halo Lansamentu ba ai-horis sira, ne’e parte ida atu bele partisipa ba iha dezemvolvimentu no kontribui ba iha produsaun ai-han sira, ho nutrisaun di’ak no aumenta kuantidade hodi kore aan husi dependensia importasaun rai liur.
Iha Fatin hanesan Prezidente Instituitu Nasionál Kombate (INC-SIDA) Atanasio de Jesus, hateten, objetivu husi kuda ai-oan ne’e bainhira fo fuan bele aumenta nutrisaun di’ak hodi proteje imunidade umanu nian liuhosi moras oioin.
“Ho nune’e ami koordena ho MAP oinsa mak bele hetan ai-horis di’ak bele kuda iha fatin ne’e, aban bainrua ita bele utiliza ba saude ema nian”, tenik nia.
Entretantu tuir observasaun husi Media ONE Timor nota katak, iha ambitu lansa kuda ai-oan ba iha edifisiu Sentru Rekuperasaun Saude ne’e la’o ho di’ak no hetan akompana husi Vise Ministru MAP no mos autoridade lokal inklui funsionáriu CRS nian. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.