(Eskritores Formandu Ceftec 2023; Regina Natalina, Luzinha de Jesus, Paulino Moniz, Teobursi Soriano, Edmundo daCosta, Agusto dos Santos)
Dili (Media ONE Timor) – Lixu mak sasan sira ne’ebé Ita ema la uza no serve atu soe. Lixu iha tipu rua; organiku no la organiku. Lixu organiku mak lixu sira ne’ebé bele dodok no lixu ne’ebé la bele dodok mak Ita hanaran não orgánico. Lixu ne’ebé organizadu sei fó benefísiu ba Ita ema tanba ema bele halo resiklazen sai fali sasan seluk ne’ebé ekonómikamente azuda ema. Maibé se lixu ne’ebé mak la organizadu ka lixu ne’ebé mak la soe iha nia fatin bele fó impaktu negativu ba ambiente, saúde no sosíu ekonómiku.
Kapitál Díli sai hanesan sentru atividade ekonómika, estudu no politíka maibé risku bo’ot ba inundasaun bainhira udan tau mak’as durante oras rua ba leten. Lixu naklekar iha fatin-fatin quase Díli laran tomak até fatin turistika sira hanesan area branca mós nakonu ho lixu.
Lixu naklekar sai hanesan pontu de partida hodi eskritor sira koko halo análize no foti problema nia fukun mak komunidade menus konsiensia atu soe foer iha nia fatin. Hosi ne’e eskritor sira fahe fila fali ba parte tolu; konsiensia moris iha komunidade, lixu iha Kapital no papel komunidade no Governo hodi reduz lixu.
Eskritor sira sei konklui ho krítika no sujestaun balun hodi leitor sira bele tetu atu nune’e Ita hotu kontribui ba redusaun lixu iha ita nia rai liu-liu iha Kapital Díli. Asaun sira kona-ba redusaun lixu, sei fo benefísiu ba saúde no dada turista sira bele mai visita iha fatin turistiku sira.
Naturalmente ema hotu-hotu moris iha ema seluk nia leet. Ema nia moris hamutuk ne’e, konstrui grupu lokal ida nebé mak okupa fatin ida jeografikamente definidu no toman ona ho natureza kultural no históriku nebé mak hanaran komunidade. Tanba ida ne’e mak Aristóteles define ema ne’e ser ida naturalmente inperfeita nune’e necessita ema seluk atu to’o iha nia perfeisaun iha komunidade ida nia laran[1]. Moris hanesan komunidade ne’e, difísil tanba ema ida-idak la hanesan haré husi maneira de ser. Maibe buat ida nebé hanesan mak ema hotu-hotu iha consiênsia atu hatene loos no sala. Konsiensia sai hanesan xave ida atu moris iha komunidade ida.
Soe foer sai hanesan ábitu ida nebé ema sempre halo. Lixu nebé desorganizadu mai hosi ema nia defeitu sira tanba la uza konsiensia iha aktus nebé sira hala’o. Ema ne’e naturalmente livre maibé moris iha komunidade ezije ema nia responsabilidade. Responsabilidade la halakon ita nia liberdade maibé guia ita nia liberdade atu harí cominidade ida nebé harmonia.
Kondisaun Sidade Díli ne’ebé la kontroladu hamosu urbanizasaun nebé mak azajeradu no hamosu ona problema oi-oin mak hanesan violensia, desenpregu, kiak nia númeru sa’e. Kondisaun ida ne’e mos aumenta volume lixu nebé mak aas kada tinan. Iha tinan 2011 Governo iha deit kamioneta 8 atu raut foer maibé iha tinan 2023 Governo iha ona kareta 70 hosi kompañia 5 nebé mak governo kontratu atu transporta lixu hosi Dili ba Tibar.[2]
Númeru populasaun iha Kapital Díli iha 2010 hamutuk 193,563 to’o tinan 2023 aumenta ba 277,488[3] maibé lixeira iha Díli laran nia númeru la aumenta no la iha rehabilitasaun nune’e rezulta lixeira barak mak la uza. Problema ida ne’e mak sai nudar kausa ida hodi lixu la organizadu no naklekar iha Sidade Díli.
Lixeira nebé la sufisiente no kloot la cabe ona ba volume foer nebé aumenta ho tan komunidade nebé la iha konsiensia atu soe foer tuir tempu no fatin sai hanesan impaktu prinsipal ba Sidade Díli nakonu ho lixu.
Sidadaun hotu-hotu iha direitu atu asesu ambiente nebé saudavel[4]. Maibe ko’alia konaba direitu, ita mos koalia konaba dever. Dever sidadania mak kumpri lei no regulamentu nebé mak estabelese ona iha Estadu de direitu demókratiku.
Abitante sira kada bairu iha dever atu kontribui ba ambiente nebé moos. Família ida-idak hola konsiênsia atu halo jestaun ba foer sira nebé sira produz; ne’e signifika presisa konsiênsia pesoál hodi tane aas interese komúm hodi soe foer tuir tempu no fatin nebé determina ona hahu hosi tuku 4 too tuku 7 dadeer.
Governo iha papél importante atu halo redusaun lixu tanba ne’e mak Governo hamosu ona estrátejia oi-oin mak hanesan; halo resiklajen, programa zero platiku, rehabilitasaun lixeira Tibar tuir estandarizasaun internasional.
Lixu nebé mak naklekar iha Sidade Díli fo impaktu direta ba komunidade nia saúde hanesan ispa, isin katar no diarea. Lixu nebé la organizadu sei estraga fatin turístiku sira hodi la atrai turista sira hodi ba visita. Ho ida ne’e, inpede kresimentu ekonómiku iha rai laran.
Sidadaun di’ak mak Sidadaun nebé iha responsbilidade ba Sidade moos hodi kontribui ba dezenvolvimentu nebé equilibru no sustentavel. Konsiensia humana kada pesoál sai fator determinante hodi suporta programa Governo atu reduz lixu iha Sidade Díli.
[1] Brasilescola.uol.com.br
[2] Notícia Média One Timor, edição 2/4/2023, Komunidade La Iha Konsensia, Kapital Dili Nakonu Ho Lixu
[3] UN World Urbanization Prospects
[4] Constituição RDTL, Artigo 57, alinea 1(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.