Opiniaun: Press Statement  AJTL Kona-ba Sirkular Hosi HNGV

Press Statement  AJTL Kona-ba Sirkular Hosi HNGV Hodi Bandu Jornalista Labele Halo Kobertura Iha HNGV 

Dili (www.mediaonetimor.co) – 02 – 04 – 2024 – Mídia ka jornalista hola papél importante iha país sira ne’ebé opta polítika rejime demokrasia, liuliu oinsa atu asegura ninia sidadaun sira hodi hetan informasaun lolos no kredivel liga ho servisu públiku nian. Tuir ninia evolusaun, liuliu iha era dijitál dadauk ne’e, midia ka jornalista la’ós deit tranzmite informasaun, maibé hala’o mós funsaun kontrolu sosiál liuhusi ninia reportajen investigativu sira. Funsaun kontrolu sosiál ka papél media watch dog ne’e halo atu asegura katak servisu públiku sira hanesan implementasaun projetu sira tuir duni sistema aprovizionamentu, planu orsamentu no planu ezekusaun nian. Tanba ne’e, iha país demokrátiku hanesan Timor-Leste la’ós estrañu bainhira mídia ka jornalista halo kobertura iha espasu públiku sira hanesan ospitál, eskola, aeroportu, palásiu no edifisiu públiku sira seluk iha país ne’e kona-ba asuntu sira liga servisu administrasaun públiku nian sein impedimentu.

Nu’udar pilár ka airin demokrasia nian, mídia ka jornalista hala’o mós ninia mandatu konstitutionál nu’udar haktuir iha Artigu 40 no 41 atu garante no hakunu sidadaun hotu ninia direitu atu asesu informasaun sein interferénsia husi parte ruma. Funsaun kontrolu mídia nian mós halo atu garante polítika boa governasaun ne’ebé baibain polítiku ka lidér sira país ida-ne’e nian ko’alia no promove iha fatin barak tantu iha railaran ka iha railiur. Tanba ne’e, Asosiasaun Jornalista Timor Lorosa’e (AJTL) ne’ebé durante ne’e halo advokasia hodi promove no hametin liberdade imprensa no liberdade espresaun iha país demokrátiku ida-ne’e’ haree katak Karta sirkulár husi Diretora Ezekutiva Hospital Nacional Guido Valadares (HNGV), Sra. Cecilia Barros hodi bandu mídia ka jornalista sira halo kobertura iha HNGV ne’e nu’udar tentativa no ameasa ida ba liberdade imprensa no liberdade espresaun iha Timor-Leste hanesan haktuir iha Konstituisaun RDTL, Artigu 40 no 41.

Diretora Cecelia tenke konsiente ou sadar katak, Ospitál Nasionál ne’e espasu públiku, la’ós espasu privadu kargu xefia ka governante ruma nian nune’e bandu sidadaun ka jornalista sira atu asesu informasaun liga servisu públiku nian, liuliu atividade sira ospitál nian. Bainhira ema ruma halo vídiu ka hasai foto ruma no manipula hodi publika iha mídia sosiál kona-ba atividade ospitál nian, iha meiu oioin atu kontra ida-ne’e, la’ós bandu fali sidadaun no jornalista bainhira halo vídiu no hasai foto iha espasu públiku hanesan ospitál nasionál.

AJTL haree katak Karta sirkulár ida-ne’e hakanek ona liberdade imprensa, liberdade espresaun no valór demokrasia iha Timor-Leste iha tempu ne’ebé Timor-Leste prepara-an atu tama iha ASEAN. Bazeia razaun sira temi iha leten AJTL harak hato’o nia pozisaun hanesan tuir mai:

• AJTL kontra no kondena maka’as karta sirkulár husi diretóra ezekutiva HNGV ne’ebé diriji ba públiku, mídia ka jornalista sira iha kontestu kobertura no liberdade espresaun tanba sirkulár ida-ne’e la tane prinsípiu boa governasaun iha país demokrátiku Timor-Leste.
• AJTL konsidera karta sirkular ne’e ho intensaun atu taka informasaun sira kona-ba prosesu tratamentu saúde, falta aimoruk no falta medikamentu sira seluk dadauk ne’e akontese iha HNGV tanba kestaun inkapasidade jestór sira HNGV no Ministériu Saúde nian.

Ho pozisaun ida-ne’e, AJTL husu ba:

• Diretora Ezekuativa HNGV Sra. Cecilia atu dada fila karta sirkulár hodi fó espasu no biban ba mídia ka jornalista sira atu halo kobertura iha HNGV nu’udar espasu públiku atu asegura públiku nia direitu ba informasaun loos no kredivel. “
• Husu ba Povedór Direito Humano No Justica (PDHJ) atu foti medida hasoru karta sirkulár refere tanba impede ona mídia ka jornalista nian servisu hodi garante boa governasaun no públiku nia direitu ba informasaun.
• Husu mós ba SECOMS atu fó hanoin ba governante sira ka kargu xefia sira instituisaun Estadu nian atu fó informasaun ba jornalista sira liga servisu públiku nian, la’ós atu impede fali jornalista sira husi kobertura.

• Jornalista sira no kanál mídia hotu-hotu iha railaran atu fó salidariade ba malu hodi kontinua publika informasaun sira kona-ba falta aimoruk iha HNGV, sentru saúde no postu saúde sira iha railaran tanba Timor-Leste dadauk ne’e infrenta hela krize aimoruk.

• Jornalista no kanál mídia hotu-hotu atu nafatin kumpri Kódigu Étika Jornaístika, Lei Komunikasaun Sosiál no prinsípiu sira jornalizmu nian bainhira hala’o knaar jornalizmu iha ne’ebé deit atu nafatin asegura no garante liberdade imprensa no liberdade espresaun iha Timor-Leste.

Viva AJTL, viva liberdade imprensa no liberdade espresaun.