(Hakerek nain Formandu Ceftec 2023 Francisco Robinson Pereira)
Díli, 09 Maiu 2023
Dili (Media ONE Timor) – UNP (Uma Naroman ba Povu) naran ne’ebé mai husi UKL (Uma Kbiit Laek) ne’ebé mak implementa husi VIII Governu Konstituisionál, liu husi PNDS (Programa Nasionál Dezenvolvimentu Suku) tutela iha MAE (Ministériu Administrasaun Estatál), ho kualidade di’ak tebes no preparadu kedas ho kondisaun atu komunidade bele hela ba.
VIII Governu Konstituisionál hanesan dezastre polítika ne’ebé mak iha mudansa ba formasaun ba koligasaun ka maioria-parlamentár nian, iha etapa rua, etapa dahuluk forma governasaun husi partidu CNRT, PLP no KHUNTO iha tinan 2018. Iha impase polítika iha finál tinan 2019 kauza ba Orsamentu Jerál Estadu (OJE) 2020 nian la pasa iha Parlamentu Nasionál.
Impase ne’e fó impaktu ba mákina estadu nian funsiona ho Duo-désimu, orsamentu ne’ebé aloka kada fulan ba saláriu no vensimentu, bens serviço no transferénsia públika de’it, la inklui orsamentu ba kapitál menór, liu-liu la iha kapitál dezenvolvimentu ne’ebé mak fatór importante tebes iha governasaun nian atu halo dezenvolvimentu tuir programa ne’ebé mak aprovadu ona ba períodu ida.
Governasaun etapa dahuluk iha VIII Governu Konstituisionál rahun, nune’e governasaun ne’ebé lidera husi Jenarál Taur Matan Ruak hato’o pedidu ba FRETILIN atu viabiliza hodi kontinua to’o remata iha 2023, ho nune’e etapa daruak ho formasaun husi FRETILIN, PLP no KHUNTO.
Nune’e, iha tinan 2020 Governu aprezenta OJE ba 2021 iha PN hodi aloka orsamentu ba programa pilotu UKL ikus mai muda naran ba UNP hosi governasaun etap daruak nian. Iha etapa dahuluk, ba OJE 2019 la inklui programa ne’e. Maibe, ikus mai iha festa demokrasia partidu sira hadau malu ba UNP iha palku polítiku.
Iha informasaun falsa barak ne’ebé naklekar iha públiku katak, UNP ne’ebé Governu Timor-Leste konstrui mai husi fundu Austrália tanba komunidade barak mak fásil atu fiar ba propaganda hirak ne’e. Dadus hatadu katak, iha OJE entre 2021 to’o 2023, Governu propoin orsamentu $ 188,9 milloeñs ba konstrusaun UNP ne’e ho totál 9.854.
Husi totál ne’ebé haktemik, iha tinan 2021 Governu konstrui UNP hamutuk 1.254, tinan 2022 harii tan UNP hamutuk 5.000 no iha tinan ne’e, 2023, konstrui tan UNP hamutuk 3.600 iha territóriu Timor, sitadu husi média Totoli[1].
Konstrusaun UNP ne’e tuir KRDTL (Konstituisaun Repúblika Demokrátika Timor-Leste) artigu 57.o ne’ebé ko’alia kona-ba ‘Hela-fatin’ katak, “ema hotu iha direitu ba nia an, nia família atu iha uma ida ho nia dimensaun no kondisaun di’ak, moos no konfortu atu bele iha intimidade ba ema idaidak no privasidade familiár”.
UNP la’ós programa foun ba órgaun ezekutivu iha Timor-Leste, kontinuasaun husi programa MDG (Millennium Devolopment Goals) ne’ebé konstrui husi V Governu Konstitusionál forma husi AMP (Aliansa Maoria Parlamentár: CNRT, PD no Frente-Mudança) iha tinan 2012 to’o 2014, hodi fó konfiansa ba empreza CARYA TIMOR-LESTE PTY LTD ne’e naran koñesidu BTK mak manan iha prosesu aprovizionamentu iha loron 05/10/2011, ho Kontratu Númeru RDTL-11004352, ho orsamentu $ 86,898,684.00 hodi konstrui uma MDG hamutuk 11,140 iha territóriu Timor-Leste, sitadu husi média Tempo Timor[2].
Uma MDG hanesan programa V Governu Konstituisionál hodi konstrui uma 11,140 ho orsamentu totál $ 86,898,684.00, ne’ebé mak ladún iha kualidade no la kondís ho povu nia hakarak, nune’e uma hirak ne’e la utiliza husi komunidade tanba nia konstrusaun halo hanesan cobe house.
Kompara ho UNP ne’ebé gastu husi OJE entre 2021 to’o 2023 ho orsamentu totál $ 188,9 milloeñs hodi konstrui uma hamutuk 9.854 ba povu ho nia kualidade adekuadu no kondís ho moris, moos no iha sira nia rain rasik, tuir programa VIII Governu Konstituisionál.
Ita presiza hatene programa iha governasaun ne’e rasik, iha programa longu prazu ho forma jerál ho durasaun ba tinan 30, programa médiu prazu hanesan pakote programa ida ne’ebé kada governasaun no kurtu prazu hatuur kada tinan-tinan ho nia tarjetu ka metas anuál nian hanesan PAA (Planu Asaun Anuál).
Tanba ne’e, UNP tama iha PAA iha 2021, 2022 no 2023 husi órgaun ezekutivu nian ne’ebé mak hetan aprovasaun husi Parlamentu Nasionál no promulga husi Prezidente Repúblika. Karik, UNP ne’e hanesan programa ida husi VIII Governu Konstituisionál, tansá la tau iha PAA 2019 nian no la ezekuta iha momentu ne’ebá?
Iha palku polítiku la merese atu hadau malu ba UNP ne’ebé mak konstrui ona, povu mak benefisia ba programa sira ne’ebé mak iha ona, tanba ne’e hato’o ba povu saida mak sei halo husi partidu ne’e bainhira ba ukun no lidera governasaun da-9 nian. Ida ne’e atu dehan de’it ba polítiku sira katak, iha palku polítiku rekoñese obra sira ne’ebé iha kualidade no adekuadu iha governasaun sira liu bá, no halo kompromísiu atu hadi’a ba lakuna (kesalahan) ka kontinua dezenvolvimentu sira be paradu hela (mangkrak) no mós kontinua obra sira ne’ebé di’ak atu lori povu ba moris di’ak.
Presiza rekoñese sala ne’ebé mak halo ona, tanba laiha partidu ida mak perfeitu ba nia asaun bainhira lidera governasaun, tantu ezekuta nia funsaun ka servisu lejislasaun no fiskalizasaun iha uma-fukun.
Populasaun rihun sia resin mak agradese ba UNP ne’e no populasaun barak mak sei hein hela atu benefisia ba programa ne’e, povu hotu-hotu ejize nia kontinuasaun ba governasaun da-9 tuir mai, atu bele goza nia moris iha Timor nia ukun aan ida ne’e tuir artigu 57.o iha KRDTL ne’e. Timor-Leste, povu presiza aksaun ne’ebé real no adekuadu, la’ós kompromísiu mamuk sira’.
(Asesu Youtube/Facebook https://www.facebook.com/Media1Timor Media ONE Timor)
Referénsia
Konstituisaun Repúblika Demokrátika Timor-Leste. (2002). Artigu 57.o “Hela-fatin”.
TATOLI, ANTIL,IP. (2023). 2021-2023: Pemerintah dirikan 9.854 UNP seluruh territori Timor-Leste. Publika iha loron sexta (31/03/2023), asesu iha loron segunda (09/05/2023). Disponível online iha: https://id.tatoli.tl/2023/03/31/2021-2023-pemerintah-dirikan-9-854-unp-di-seluruh-teritori-timor-leste/
Tempo Timor (2020). Governu fo dalan ba emprezáriu Indonéziu BTK sai riku iha TL. Publika iha loron Domingu (27/12/2020), asesu iha loron segunda (09/05/2023). Disponível online iha: https://tempotimor.com/ekonomia/4606-governu-fo-dalan-ba-emprezariu-indoneziu-btk-sai-riku-iha-tl
[1] https://id.tatoli.tl/2023/03/31/2021-2023-pemerintah-dirikan-9-854-unp-di-seluruh-teritori-timor-leste/
[2] https://tempotimor.com/ekonomia/4606-governu-fo-dalan-ba-emprezariu-indoneziu-btk-sai-riku-iha-tl
Ita nia komentariu konaba post ne'e.