(Reportajen Tomas Reis/Editora Suzana Cardoso)
Baucau (Media ONE Timor) – Preparasaun kaixaun ba mate isin tinan 2022 nian hamutuk 125. Maibé, tanba limitasaun orsamentu maka hatuun tiha ba 61 de’it.
“Preparasaun kaixaun ba ema mate bainhira família kbiit la’ek sira presiza iha tinan 2022 nian hamutuk 125. Maibé bazeia ba orsamentu limitadu, nune’e prepara de’it kaixaun 61.”
Perkupasaun ne’e hato’o hosi Diretóra Diresaun Asaun Sosiál (DAS) Munisípiu Baucau Baucau, Regina de Sousa ba Média ONE Timor iha iha nia kna’ar fatin Baukau Vila Nova, semana ne’e.
Nia hateten, hosi kaixaun 61 ne’e, dezde fulan Janeiru to’o fulan Juñu 2022 Servisu Asaun Sosiál Baucau apoiu ona kaixaun 57 ba família kbi’it la’ek sira.
Katak Regina, kaixaun 57 ne’e fó ba Postu Administrativu Baguia hamutuk 5, Baucau Vila 20, Laga 2, Quelicai 16, Vemase 4 no Venilale 10. Nune’e iha DAS hela de’it ona kaixaun haat.
“Agora dadauk ami planu atu husu ajuda ba Ministéru Soliedaridade Sosiál no Inkluzaun (MSSI) atu bele apoiu fali kaixaun mai iha ne’e. Tanba iha ne’e kaixaun hela haat de’it ona”, dehan Regina.
Regina esplika ho espesifikasi katak, kada kaixaun ho nia kruz kedas. DAS moos fó ho orsamentu transporte tula nian hamutuk 350 USD. Nune’e kaixaun 61 ne’e nia orsamentu hamutuk 21,350.00 USD.
Katak Regina, kaixaun no osan ne’e la to’o. Foin maka Fulan Juñu 2022 de’it kaixaun laiha ona. Nune’e, hahú Fulan Jullu to’o Dezembru 2022 DAS labele fó apoiu kaixaun ona.
“Husu ba governu sentral atu tau atensaun ba asuntu ne’e. Tanba ami labele halo buat ida kuandu familia kbiit la’ek sira mai husu ajuda konaba kaixaun mate nian”, dehan Regina.
Enkuantu iha tinan 2022, Governu Sentral aprova orsamentu ba DAS Baucau liuhosi autoridade munisípal hamutuk 69,797.70 USD, hodi jere ba bens servisu ho bensimentu nian de’it.(Asesu youtube Facebook Média ONE Timor)
Ita nia komentariu konaba post ne'e.