MEDIAONETIMOR– Sai hanesan ezemplar ida ba mundu entre nasaun viziñu ho Indonezia durante tinan 18 maka Timor-Leste (TL) sei partisipa eventu paralelu altu nivel paz no rekonsiliasaun iha Nova Yorke.
“Partisipasaun TL iha Nova Yorke, Loron 20 Setembru 2017 ne’e hodi fahe esperensia TL nian durante tinan 18 iha konsolidadsaun paz no konsolidasaun estadu. Liu-liu Pais viziñu Indonesia ho TL ne’ebe sai hanesan ezemplar ida ba mundu.”
Lia hirak ne’e hato’o hosi Sekretariadu G7+, Helder da Costa ba jornalista hafoin remata enkontru ho Prezidente Repúblika (PR), Francisco Guterres Lú Olo iha Palasiu Presidensial, Tersa, (05/09/2017).
Esplika Helder, organizasaun inter governamental G7+ ninian ohin mai halo audensia ida ho PR Lú Olo hodi konvida para ba partisipa eventu paralelu altu nivel konaba paz no rekonsiliasaun iha Nova Yorke ne’e.
Nune’e katak Helder, PR Lú Olo sei desloka ba Nova Yorke hodi partisipa Konferensia Internasional Asembleia Jeral Nasõens Unidas ne’e. Iha ne’eba tuir planu, PR Lú Olo sei halo diskursu ida iha konsellu seguransa ONU nian, Loron 20 Setembru.
Katak Helder, G7+ ho misaun permanente TL ninian iha loron hanesan organiza mos eventu paralelu altu nivel. PR Lú Olo sei foka liu ba inisiativa paz ne’ebe esperensia TL atravesa ona durante tinan 18 iha konsolidadasaun paz no konstrusaun estadu.
“Husi ne’e PR Lú Olo sei friza iha esperensia ne’ebe mundu hakfodak. Sira hakarak hatene suseisu saida maka paz no rekonsiliasaun bele akontese entre TL ho Indonezia iha Nivel Internasional,” dehan Helder.(Reportájem Deonisio da Cruz)
Ita nia komentariu konaba post ne'e.