MEDIAONETIMOR-Dau-daun ne’e Ministeriu Finansa (MF) halo hela servisu preparasaun téknika no analiza ba dispezas orsamentu ratifikativu 2017 nian para atu fó apoiu ba VII Governu Konstituisional.
“MF halo hela servisu tékniku no analiza ba dispezas orsamentu 2017 nian para fó informasaun ba governu ne’ebé sei forma hodi hola desizaun politika, oinsa atu orienta orsamentu ratifikativu ne’ebé sei tuir mai.”
Liafuan hirak ne’e hato’o hosi Primeiru Ministru (PM), Rui Maria de Araújo ba Jornalista hafoin remata hala’o enkontru regular hó Presidente Repúblika (PR), Francisco Guterres Lú Olo iha Palasiu Presidensial, Kinta, (17/08/2017).
Enkontru regular ne’e sei halo to’o governu foun simu pose. Ne’e nu’udar obrigasaun ne’ebé hatur iha konstituisaun para atu hato’o nafatin ba PR konaba kontinuasaun governu nia jestaun, obra no programa ne’ebé mak asina ona kontratu tenki kontinua nafatin.
PM Rui esplika liutan, orsamentu ratifikativu ne’e hala’o wainhira programa Governu nian hetan ona aprovasaun iha Parlamentu. Depois Governu foun simu pose, sei iha fulan ida para aprezenta programa ba Parlamentu Nasional.
Katak PM Rui, bainhira parlamentu aprova ona progama sira mak depois foin bele lori orsamentu ratifikativu ba Parlamentu. Ne’e dala ruma sei akontese iha Fulan Outobro to’o Fulan Novembro 2017.
Nune’e tenik PM Rui, durante durasaun ne’e VII Governu Konstituisional tenki uza orsamentu ratifikativu iha tinan 2017 nian. No tenki kontinua jestaun no programa sira ne’ebé planeadu ona. Inklui, obra hirak ne’ebé maka iha tiha ona to’o arsamentu VII Governu nia orsamentu hetan aprovasaun iha Parlamentu Nasional.(Reportájem Deonisio da Cruz)
Ita nia komentariu konaba post ne'e.