(Reportajen Jacinto Caet/Editora Suzana Cardoso)
DILI (Media ONE Timor) — Durante ne’e ajensia balun laiha responsabilidade hodi fasilita joven sira ba buka servisu iha rai liur, nune’e Governu sei orienta Polisia Siéntifika Investigasaun Kriminál (PCIC-sigla Portugés) atu halo kapturasaun ba ajénsia ne’ebé fasilita joven sira ne’e.
“Ha’u husu ba ajénsia ne’ebé la autoriza hosi Governu hodi haruka joven ba rai liur, atu para ona ho atetude hirak ne’e. Lori juventude ba rai liur tenke iha responsabilidade. Hanesan Ministru Interior no mós hanesan Primeiru Ministru sei haruka PCIC atu kaer hodi kumpre lei ba ajensia sira ne’ebé laiha responsabilidade.”
Lia hirak ne’e hato’o hosi Primeiru Ministru (PM) Taur Matan Ruak, iha Palasiu Prezidensiál Bairo Pite, semana dahuluk Fulan Jullu Tinan 2022.
Xefe Governu ne’e afirma, ajensia ne’ebé lori sidadun sira ba rai liur tenke iha responsabilidade. Labele hosik abandona. Bainhira laiha ona fatin seguru mak fó sala ba Governu. Hetan fatin di’ak laliga Governu. La’o avontade loos.
Ho lian hirus PM Taur hateten, nia nu’udar Ministeru Interior sei halo orientasaun ba Ministeriu Justica no PCIC hodi tau atensaun ba krime organizadu. Tenke kaptura ba ajénsia ne’ebé lori sidadaun ba fatin-fatin.
“Tanba ha’u sai Primeiru Ministru ha’u jura kumpri lei. No ha’u tenke obriga ba ema seluk atu kumpri lei. Uluk ha’u dehan la’ós ema aat mak ita preokupa. Ita tenke preokupa mós ema ne’ebé husik ema aat. Sei ita husik de’it, ita mak sala”, PM Taur hateten.
Governu latolera ajénsia ne’ebé haruka sidadaun sira ba servisu iha rai liur. Maibé katak PM Taur, kuandu ajénsia ne’e haruka ona Timoroan ba rai liur, kaer toman tenke selu sidadaun sira fila mai TL. Tanba ajénsia mak iha osan hodi haruka Timoroan ba servisu. Laos Governu mak haruka, nune’e labele fó sala ba Governu.
Maske nune’e PM Taur promete Governu iha responsabilidade atu buka solusaun hodi evita problema hirak ne’e. Biar TL ki’ak no susar, maibé lideransa sira sei buka dalan atu sustenta. Entaun sidadaun hothotu tenke kumpre regra. Tanba, nasaun ne’e iha lei atu regula.
Katak PM Taur, Joven balun ba servisu iha Australia no Korea duku tiha passaporte hodi halai hosi sistema. Bele halai. Maibé odamatan ida de’it. Mak Governu. Ezemplu, servisu iha Australia halai mai TL ba fali sistema la autoriza ona.
“Tanba ne’e mak ha’u husu ba joven sira ne’ebé ba servisu iha Australia no Korea tenki tuir nafatin Ita nia regra sira ne’ebé iha. Regra ne’e importante. Liliu iha ema nia rain tenke kumpri nafatin regra ne’ebé aplika ona”, PM Taur dehan. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.