(Reportajen Asistente Editor Marcelino Tomae)
DILI (Media ONE Timor) – Maske seidauk iha rejultadu pozitivu ba estatutu profesór kontratadu iha territóriu laran tomak reprezentante povu iha uma fukun Parlamentu Nasionál kontinua hakilar.
Preokupasaun ne’e hato’o husi Deputada Bankada partidu libertasaun populár (PLP), Deoutada Regina Freitas ho Bankada Frente Revolusionario Timor-Leste independensia (FRETILIN), Helena Martins Bello, iha sesaun plenaria parlamentu Nasionál, Tersa (19/07/2022).
Tuir Bankada PLP Regina Freitas, katak, sira ba halo fiskalizasaun iha munisipiu sira, liu-liu iha Manatutu, profesór kontratadu hotu reklama katak, sira kontratadu tinan 10 resin ona, maibé to’o agora seidauk hetan responde ba sira nia estatutu kontratadu, mezmu sira hala’o dever nunka abandona estudante sira.
“Ami simu lamentasaun husi Profesor sira ne’e la’ós foin mak hanorin tinan 5 ka 6, maibé sira hanoin estudante tinan 10 resin ona, sira nunka abandona estudante sira. Maibe sira lamenta tanba too agora seidauk rona rezultadu pozitivu husi governu kona-ba sira nia estatutu nu’udar kontratadu”, informa Deputada PLP Regina Freitas.
Regina Freitas hatutan, profesores sira hatoo katak, durante nee sira konsidera estudante sira hanesan sira nia oan, tanba ne’e maske seidauk iha rezultadu pozitivu, maibe sira nafatin halao knaar hodi hanorin estudante, maibé sira mos hein atu governu fo rezultadu ba sira nia estatutu kontratadu.
Deputada Regina haktuir tan, la’ós ne’e deit maibé profesores balu iha ona idade 65 maibe seidauk tama ba iha reforma, tanba ne’e sira husu atu Governu tau atensaun.
Iha fatin hanesan, Bankada FRETILIN, Deputada Helena Martins Bello, hatete, profesore sira lamenta kona-ba hahú husi 2017 mai sira barak tuir formasaun atu hasae sira nia kapasidade liu husi Infordepe, iha nivel baixarelatu hotu maibe seidauk iha rezultadu, tanba ne’e husu ba ministeriu Edukasaun (ME) fó sira nia rezultadu, liu-liu ba sira ne’ebé mak kontratadu.
Hatan ba kestaun ne’e, Sekretariu Estadu no Komunikasaun Sosial (SEKOMS) Mericio Akara, hatete kona-ba kestaun ne’ebé deputadu sira foti ne’e, depois sei informa ba iha ministeriu relevante, tanba nia parte seidauk iha informasaun, tanba nee bainhira hato’o ba iha ministeriu relevante atu bele responde, i bele responde por eskrita ba deputadu sira iha Parlamentu Nasionál (PN). (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.