(Reportajen Estajiadu João Colo/Editor Astente Marcelino Tomae)
DILI (Media ONE Timor) – Atu Timor-Leste (TL) moris hakmatek iha pas no estabilidade maka Polisia Nasionál Timor-Leste (PNTL) tenke iha métodu prevensaun hodi bele normaliza problema Groupu Arte Marsiais (GAM).
“Ita nia Polísia Nasionál Timor-Leste (PNTL) mak iha metodu ka alternativa hodi halo prenvensaun no asegura estabilidade rai-laran hodi normaliza hikas situasaun ne’e rasik.”
Hatete Xefe Bankada Frente Revolusionariu Timor Independensia (Fretilin) Deputadu David Dias Ximenes alias Mandati ba Jornalista iha resintu uma fukun Parlamentu Nasionál (PN), Kuarta, (07/09/2022).
Tuir Deputadu Mandati, atu fó seguransa interna PNTL tenki iha metodu hodi normaliza lalais situasaun. Labele hamamuk fatin. Iha vizibilidade ba fatin hothotu hodi hetan partisipasaun maximu hosi sosiedade para asegura rasik sira nia moris hakmatek iha sira nia leet.
“Tanba kuandu sosiedade sira ajuda fó seguransa ona ba kualker situasaun ne’ebé mak akontese iha sira nia leet, sei hasa’e profezionalizmu PNTL nian”, katak Deputadu Mandati.
Hanesan públiku ona hateten katak kazu konfronta membru GAM hosi Persaudaraan Setia Hati Terrate (PSHT) ho membru Groupu Arte Rituál (GAR) 77 iha área Bidau Akadiru-Hun, Postu Administrativu Cristo Rei, Munisipiu Díli, Segunda (05/09/2022) to’o atake membru F-FDTL Komponente Naval, Primeiru Sarjentu Joanico Baptista Carvalho alias Apeku.
Hosi akontesementu ne’e, iha loron Tersa 06 Setembru 2022 PNTL detein ona autór na’in-haat ne’ebé deskonfia involve iha kazu asalta ka baku membru Failintil-Forsa Defeza Timor-Leste (F-FDTL) iha sela detensaun Kuartél Jerál PNTL Caicoli.
Halakon Graduasaun Ba Indonézia
Iha parte seluk tuir Deputadu Mandati, VIII Governu Konstituisionál reativa fila-fali GAM liu-liu PSHT atu nune’e Joven sira ne’ebé involve labele ba mai rai liur, liu husi fronteira ba rai viziñu Indonézia hodi halo graduasaun.
“Governu Timor-Leste ho intensaun loke fila-fila Groupu Arte Marsiais iha ita nia rai atu nune’e Ita nia maluk sira ne’ebe mak involve hanesan membru ne’e labele ba tuir graduasaun iha Indonezia. Maibe gradua de’it iha ita nia nasaun. Tamba ne’e maka labele fo sala ba sira”, tenik Deputadu Mandati. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.