MEDIAONETIMOR– Hafoin programa VII Governu Konstituisionál hetan mosaun rejisaun hosi partidu oposisaun iha Parlamentu Nasionál (PN), sidadaun sira haksesuk malu iha mídia sosiais no fatin bar-barak hodi hakarak hatene liu tan Konstituisaun.
“Hau rona no mídia fo sai katak ita nia sidadaun sira haksesuk malu iha fatin bar-barak konaba formasaun VII Governu Konstituisionál nian. Hau kontenti. Tanba, sosiedade sivil ativu. Maske barak la halo parte partidu politiku. Maibé iha interese politika hakarak partisipa debate vida politika rai ne’e nian.”
Hateten Prezidente Repúblika (PR), Francisco Guterres Lú Olo wainhira loke Kongresu Nasional Komite 12 Novembro daruak nian iha salaun Centro Convenção Dili (CCD), Tersa, (07/11/2017).
Kongresu Nasional Comite 12 Novembro daruak nian ho tema hamutuk ita luta ba moris diak sobreviventes no povu Timor-Leste (TL) tomak iha futuru, tuir PR Lú Olo, hala’o iha momentu deputadu sira sei haksesuk malu konaba posisaun VII Governu Konstituisionál nian.
Iha nia deskursu PR Lú Olo hateten, kongresu ne’e halibur lideransa no joven iha TL. Tanba, halibur jerasaun tuan no jerasaun foun iha momentu deputadu sira sei haksesuk malu hela.
Katak PR Lú Olo, deputadu sira seidauk tane didiak atu tau hamutuk sira nia matenek nu’udar bankada parlamentar apoiu governu. No bankada parlamentar halo opozisaun ba governu hodi hetan prekupasaun hosi sosiadade TL.
“Hafoin programa VII Governu hetan mossaun rejisaun hosi partidu opozisaun, hau simu pedidu audiensia barak hosi grupu oi-oin. Sira hato’o preokupasaun oi-oin ho intensaun ajuda Prezidente Repúblika atu hakat liu dezafiu foun ida ne’e,” tenik PR Lú Olo.
Nia hateten, sidadaun sira koalia. Haksesuk malu iha fatin bar-barak konaba formasaun VII Governu nian hodi hola parte iha vida politika rai TL nian. Movimentu ne’e hamanas hotu-hotu nia laran atu hakarak hatene liu tan konstituisaun.
Dehan PR Lú Olo, debate politika ne’e halo hotu-hotu hakarak hatene lei inan ne’ebé konsagra ona iha Konstituisaun Repúblika Demokratika Timor-Leste (RDTL) no lei sira seluk. Signifika, povu TL laos hakarak vota deit tinan 5 nian. Maibé hakarak ukun nain sira rona no konsulta ho povu. Haksesuk sá politika maka diak liu ba povu nia moris no moris aban bain rua nian.
Nune’e laos partidu politiku sira deit katak PR Lú Olo, maka tenki halo dialogu permanente ho komunidade sira. Orgaun Soberania Parlamentu no Governu tenki haré mos oinsa halo dialogu permanente ho sosiedade liu hosi kontaktu direitu. Katak ema ba ema no liu hosi meius komunikasaun sosial.
“Ikus liu, hau nia liafuan soe hela ba kongresista sira. No ba kompatriota sira hotu. Ba ita nia lider sira hotu para; hamutuk, haktuir, habelar no hametin valores prinsipiu,” tenik PR Lú Olo. (Repotájem Deonisio da Cruz)
Ita nia komentariu konaba post ne'e.