MEDIAONETIMOR-Hafoin liu tiha situasaun seguransa todan iha kampaña no Eleisaun Lejislativa 2017 nian hó hakmatek, Prezidente Repúblika (PR), Francisco Guterres Lú Olo husu ba Falintil-Forsa Defeza Timor-Leste (F-FDTL) no Polisia Nasional Timor-Leste (PNTL) atu tau atensaun ba tomada de pose Parlamentu Nasional (PN) no VII Governu RDTL.
“Husu Instituisaun F-FDTL hó PNTL atu tau atensaun liu ba iha Kapital Dili. Tanba la kleur tan sei halo eventu tomada de pose ba PN hó Governu,” lia fuan hirak ne’e hato’o hosi Komandante F-FDTL, Major General Lere Annan Timur ba jornalista hafoin halo reuniaun hó PR iha Palacio Prezidensial Aitarak-Laran, Kuarta, (02/08/2017).
Tuir Major Lere, situasaun politiku no situasaun rai laran sei lao estabil to’o forma membru PN no Governu foun iha Fulan Augostu nia laran ba to’o halo tomada de pose. Situasaun iha nivel nasional kalma. Tanba timoroan sira hakarak moris hakmatek iha progresu dezenvolvimentu.
Reuniaun nivel devesa ne’e Mayor Jeneral, Lere hetan akompaña husi Brigadeiro General, Filomeno da Paixão de Jesus ho Coronel Falur Rate Laek Mayor General, Lere hodi koalia konaba situasaun politika no situasaun rai laran ba PR Lú Olo.(Reportájem Deonisio da Cruz)
Ita nia komentariu konaba post ne'e.