(Reportajen Jornalista Media ONE Timor Mariquita Frietas)
Dili (www.mediaonetimor.co) – Hatudu kompromisiu Reinu Unido nian hodi fó apoiu ba povu Timor-Leste (TL) nia moris sai di’ak liutan iha futuru, maka Reinu Unido sei loke Embaixada Britániku permanente iha Dili. Nune’e, Primeiru Ministru (PM) TL, Kay Rala Xanana Gusmão agradese ba sira kompromisiu ne’e.
Tuir Primeiru Ministru (PM) TL, Kay Rala Xanana Gusmão, Ministra Reinu Unido ba Indo-Pasifiku, Anne-Marie Trevelyan no Embaixadór Reinu Unido ba TL rezidensia iha Jakartá-Indonézia, Dominic Jermey liu husi konferensia imprensa ne’ebé hala’o iha salaun Gabinete Fronteira Maritima no Trestre, Palasiu Governu, Sesta, (01/03/2024), hafoin sira nia sorumutu katak, iha futuru sei hametin liutan kolaborasaun bilateral entre nasaun TL ho Reinu Unido.
Iha konferensia imprensa ne’e PM Xanana agradese Governu Reinu Unido hakarak hametin kooperasaun hodi reativa sira nia Embaixada Britániku permanente iha Dili, TL. Reativasaun embaixada ne’e sei fasilita di’ak liután Timor-oan ne’ebé ho matenek oin-oin ba buka esprensia servisu iha Reinu Unido hodi kontribui ba dezenvolvimentu TL.
“Ha’u agradese tebes ba Reinu Unido, tanba ita nia Timor-oan besik rihun-40 liu ba servisu ona iha ne’eba, maske ho passaporte Portugal, maibé Reinu Unido simu sira hanesan Timor-oan. No hosi Ministériu Justisa mós sei haruka tékniku ida ba Reinu Unido hodi ajuda Timor-oan sira ne’ebé problema barak ho pasaporte liu prazu”, PM Xanana esplika.
Reinu Unido hakarak loke sira nia embaixada permanente iha TL katak PM Xanana, ne’e di’ak tebes. Aliende ne’e, Reinu Unido mós hakarak apoia iha área oin-oin. Hanesan; edukasaun, saúde, nutrisaun no seluk tan. Nasaun ne’e mós sei apoia to’o TL nia adeazaun ba ASEAN.
Lia fuan agradese hanesan mós hato’o husi Ministra Reinu Unido ba Indo-Pasifiku, Anne- Marie Trevelyan. Nia hatete, iha vizita daruak ne’e hodi reafirma sira nia apoia ba TL iha setór importante ne’ebé estabelese hosi nasaun rua ne’e.
“Ha’u kontenti tebes mai vizita Timor-Leste ba dala rua nian. Tanba, ne’e hanesan oportunidade di’ak atu halo kolaborasaun iha relasaun bilaterál entre Timor-Leste ho Reinu Unido, hodi nune’e bele reativa Embaixada Britanika”, Trevelyan deklara.
Nasaun TL nu’udar nasaun ida ne’ebé importante liu ba Reinu Unido. Nune’e, nasaun rua ne’e nu’udar belun ho relasaun ne’ebé forti dehan Trevelyan hodi hatutan, “Ha’u orgullu katak servisu ami nian bele hadi’ak ba moris Timor-oan tomak. Tanba ne’e, absolutamente importante ba Reinu Unido atu iha prezensa permanente iha Timor-Leste.”
Hatan objetivu sorumutu ho PM Xanana, Trevelyan esplika katak sira halo diskusaun ne’ebé importante kona-ba dalan atu haforsa kolaborasaun iha área oi-oin. Inklui, apoia preparasaun TL nian ba adezaun ASEAN, dezenvolvimentu ekonómiku TL nian, saúde no nutrisaun.
“Ohin, ha’u mós kontenti atu anunsia intensaun Governu Reinu Unido nian hodi loke fila fali Embaxada Reinu Unido nian iha Dili. Ne’e hatudu kompromisiu Reinu Unido nian hodi fó apoiu ba povu Timor-Leste nia moris sai di’ak liutan”, Trevelyan reforsa hodi hatutan.
Reativasaun Embaxada Británika permanente iha Dili, sei marka faze importante ba relasaun bilaterál ne’ebe forti liu entre nasaun rua ne’e hodi intensifika servisu hamutuk ne’ebé iha ona durante tinan rua ba kotuk ne’e. Inklui, vizita resente husi Prezidente Ramos-Horta ba Reinu Unidu iha fulan Janeiru tinan 2024.
“Ha’u iha esperansa boot atu Estadu Unido Britániku sei estabelese sedu Embaixada Británika iha Dili. Nune’e bele kontinua relasaun di’ak entre Reinu Unido ho Timor-Leste hodi suporta ba dezenvolvimentu ekonomiku no prosperidade ba Timor-oan tomak”, Trevelyan hatete.
Iha fatin hanesan Embaixadór Reinu Unidu ba TL rezidensia iha Jakartá, Indonézia, Dominic Jermey agradese Reinu Unido anùnsia ona intensaun atu reativa ninia embaixada iha TL ne’ebé hahú kedas iha tinan hirak liu ba.
“Ha’u estabelese dahuluk misaun Reinu Unido nian ba Administrasaun Trazisionál Nasoins Unidas nian iha Timor-Leste. Ha’u orgullu katak, Reinu Unido, dala ida tan prova impotánsia relasaun entre Timor-Leste ho Reinu Unido liu hosi embaixada foun ida ne’e,” tenik Dominic.
Katak Dominic, nasaun rua ne’e nu’udar belun di’ak ona iha tempu barak nia laran. Reinu Unido sai ona uma ba Timor-oan lubun iha rai liur. Rai rua ne’e ninia prioridade sira ba dezenvolvimentu, politika no seguransa aliña ona.
Dominic hatete, Reinu Unido hakarak apoia TL atu kontinua dezenvolve hanesan nasaun ida ne’ebé estavél no prósperu hodi kontinua apoia ba progresu TL nian hodi sai membru kompleitu iha ASEAN.
Sorumutu ne’e termina ho parte rua entrega prenda ba malu hodi hametin kooperasaun povu no estadu. Akompaña direita hosi sorumutu ne’e Vise-Ministra ba Asuntu ASEAN, Milena Maria da Costa Rangel no Embaixadór TL ba Reinu Unido, João Paulo Rangel no partisipa mós ekipa protokolu husi Ministeriu Negosiu Estranjeiru no Kooperasaun (MNEK) nian.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.