(Reportajen Estajiadu Mdia ONE Timor Mariquita/Teotonia)
Dili (www.mediaonetimor.co) – Kompañia koñesidu ida hosi nasaun viziñu Australia ho naran People In RWN, husu autorizasaun ba Primeiru Ministru (PM) Kay Rala Xanana Gusmão atu rekruta Timoroan maizu menus besik 10.000-resin (rihun 10-resin) hodi ba servisu.
“Primeiru Ministru (PM) Xanana kontente hodi agradese ba kompañia boot ida husi Australia ho naran people In RWN ne’ebé maka iha tempu besik sei rekruta traballador Timoroan besik rihun 10-resin hodi ba servisu iha ne’ebá. Prosesu rekrutamentu sei hala’o etapa por etapa.”
Hateten Sekretariu Estadu politika formasaun profesionál no empregu (Sefope), Rogeiro Araujo Mendonca ba Jornalista iha Palasiu Governu, Kinta, (10/08/2023) hafoin akompaña Embaixadora Timor-Leste (TL) ba Australia Ines Almedia no Diretor Executivu Kompañia People In RWN, Tom Reardon ba hasoru PM Kay Rala Xanana Gusmão.
Esplika Sefope Rogeiro, programa IX Governu Konstituisionál nian maka hakarak redus taxa dezempregu iha Timor-Leste. Maka, ideia boot husi kompañia People In RWN nian ne’e lori direta mai hasoru PM Xanana hodi introdus politika atu hala’o reruktamentu ba trabalhador Timoroan sira ne’ebé atu ba servisu iha Australia.
Dehan Sefope Rogerio, PM Xanana agradese tebes ba ideia di’ak ne’e hodi husu parte Sefope servisu hamutuk ho kompañia People In RWN hodi halo preparasaun ba rekrutamentu ba traballador Timoroan sira.
“Primeiro Ministru Kay Rala Xanana Gusmão agradese tebes ba Diretor Executivu Kompañia ne’ebé boot teb-tebes iha Australia, Tom Reardon. Tanba, kompañia ne’e hakarak atu ajuda redus numeru dezempregu iha Timor-Leste”, Sefope Rogerio hatete hodi hasaran PM Xanana nia lia fuan.
Hatutan Sefope Regorio, ba PM Xanana diretor executivu kompañia People In RWN moos esplika katak sira sei rekruta traballador Timoroan liu rihun 10 ba serbisu iha Australia, iha area agrikultura, industria, fabrika, hospitalidade no area sira seluk tan.
Katak Sefope Rogerio, sira presiza halo rekrutamentu ba traballador ne’ebé barak loos ne’e tanba kompañia ne’e iha Austria boot tebes. Nia emprega traballador iha Australia barak loos. Nune’e, Timoroan sira tenke preparadu.
“Kompania People In RWN aprezenta ba PM Xanana katak kriteria rekrutamentu maka sei halo uluk formasaun ba Timoroan sira nia mentalidade hodi servisu ho dixiplina no hakruuk ba regulamentu sira iha kompañia nia no moos Nasaun Australia nian”, dehan Sefope Regorio.
Esplika Sefope Regorio, prosesu rekrutamentu sei loke iha kada munisipiu hodi tuir kursu Inglesh. Remata tiha kursu maka kompañia no parte Sefope sei halo intervista ba kandidatu traballador sira. Maibé, rekrutamentu ne’e sei fahe ba etape-etape.
Iha oportunidade ne’e Embaixadora Timor-Leste ba Australia, Ines Almeida husu ba juventude feto no mane sira atu prepara an kumesa agora hodi tuir formasaun lian Inglesh. Nune’e, bainhira kompañia sira presiza sira bele hetan ona oportunidade atu serbisu ho dignu.
“Kompañia People In RWN koñesidu iha Australia. No kompañia ne’e hakarak simu de’it maka traballador sira husi Timor-Leste. Tanba ne’e husu ba kandidatu sira atu prepara an. Tuir kursu Inglesh hodi faselita traballador sira bainhira ba servisu. Sira bele halo komunikasaun ho di’ak”, katak Ines.
Hatutan Embaxadora Australia, Ines, tuir pedidu Diretor Executivu Kompañia people In RWN, Tom Reardon ne’ebé hato’o ba xefe Governu katak sira atu simu traballador Timoroan to’o rihun 10-resin.
Nune’e katak Ines, Sefope sei servisu hamutuk ho Kompañia people In RWN ne’ebé sei rekruta tuir etapa. Tanba sira hakarak emprega Timoroan ne’ebé ba servisu iha Australia kuaze rihun 10 ba leten, iha area tekniku sira.
“Husu ba joven sira atu aproveita tempu livre hodi ba tuir kursu Inglesh hodi halo preparasaun ho maximu. Tanba kompañia ne’e presiza ema ne’ebé hatene ko’alia Lian Inglesh hodi halo komunikasaun no bele orienta sira iha serbisu fatin”, dehan Ines. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.