(Reportajen Jornalista Media ONE Timor Mariquita Freitas)
Dili (www.mediaonetimor.co) – Era dijitálizasaun fó impaktu ba sosiedade no empreza sira hodi infrenta problema transformasaun mundiál. Problema hirak ne’e mak hanesan; violénsia tráfiku iha médiu oriente nu’udár akontesimentu reál, mudansa profunda estruturál hahú hosi jeo- ekonomia, mudansa klimátika to’o intelejénsia artifisiál.
Nune’e rejiaun hotu-hotu iha mundu, inklui Timor-Leste (TL) sei servisu hamutuk hodi fó prioridade ba programa inovativu hirak ne’ebé dezenvolvidu bazeia bá reuniaun ne’ebé realiza antes ona ho nia senáriu bá sesaun sira tuir programa pilár importante haat.
- Alkansa seguransa no kooperasaun iha mundu ida ne’ebé laiha unidade.
- Intelijénsia artifisiál nu’udár forsa prinsipál bá dezenvolvimentu ekonomia no sosiedade.
- Kria krezimentu no empregu iha era foun.
- Estratejia longu prazu bá klimátika, natureza ho enerjia.
Tuir komunikadu imprensa ne’ebé maka asesu husi Media ONE Timor hatete, servisu hamutuk ba programa inovativu ne’ebé dezenvolvidu ona ne’e, sei hala’o liu husi Forum Ekonómiku Mundiál (World Economic Forum-lian Inglesh) bá dala-54 ne’ebé sei hala’o iha Davos-Klosters, Nasaun Suiça.
Forum Ekonómiku Mundiál ne’ebé sei hala’o husi loron 15 to’o loron 19 Fulan Janeiru tinan 2024 ne’e, husi TL sei partisipa husi Primeiru Ministru (PM), Kay Rala Xanana Gusmão ne’ebé aranka ona iha loron 15 Janeiru 2024 ho aviaun citilink.
Reuniaun annuál Forum Ekonómiku Mundiál ne’e sei halibur rejiaun hotu-hotu iha mundu. Tanba ohin loron ema, sosiedade no mós empreza sira enfrenta realidade iha transformasaun mundiál, maka ejize lider mundiál sira atu dezenvolve plataforma no diálogu, parseria ne’ebé forte, estabelese kuadru polítiku ne’ebé forte, implementasaun teknolojia ne’ebé efikas atu bele lori benefisiu direta no bele implementa ba sosiedade iha kurtu prazu.
Nu’udár fórum organizasaun internasionál bá kooperasaun públiku no privada, maka reuniaun annuál Forum Ekonómiku Mundiál ne’e, sei aproveita ho máxima husi lider mundiál sira hodi sai hanesan plataforma bá diálogu inkluzivu iha tempu naruk.
Enkuantu PM Kay Rala Xanana Gusmão sei hasoru malu mós ho lider mundiál balun hodi deskute no hametin kooperasaun TL iha setór oin-oin ne’ebé liga ho tema forum ekonómia mundiál ne’e nian.
Vizita Xefe Governu TL ne’e, akompaña hosi ekipa Ministériu Negósiu Estranzeirus no Kooperasaun. PM Kay Rala Xanana Gusmão ho ekipa, sei fila hikas mai TL iha loron 20 Fulan Janeiru Tinan 2024. (Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.