(Reportajen Estajiadu Emanuel Moniz Gabriel/Editor Marcelino Tomae)
Dili (Media ONE Timor) —Tempu kuarezma ka loron hadera-an nian. Santa Kreda konvida sarani sira atu iha fiar ida de’it la’o hamutuk iha orasaun, karidade no jejúm hodi kontempla Maromak Nia hakarak iha moris loro-loron nian.
“Iha dalan tolu ne’ebé esensial atu iha kuarezma ne’e ita ida-idak buka atu kumpre ho neon no laran mak Ezmola ka Karidade, Orasaun no Jejúm. Iha la’o hamutuk ne’e mak bele tulun ema atu persevera katak fiel halo didi’ak ita nia orasaun, karidade no jejúm hira ne’e, atu ita halo nu’udar família, grupu no instituisaun, la’ós atu hafuhu malu, la’ós mos atu haree malu se mak di’ak no se mak ladi’ak maibé atu hola konsiénsia katak ita hotu ema sala na’in”
Lia ne’e kasu husi Arsebispu Arkidioseze Metropolitana Dili, Dom. Virgílio Cardeal do Carmo da Silva, SDB, iha nia omilia ba sarani sira iha selebrasaun kuarta feira sinzas, iha Igreja Katedral Dili, Kuarta (22/02/2023).
Dom. Virgílio Cardeal informa, kuarezma iha dalan oin-oin. Maske iha dalan oin-oin buat importante iha moris ne’e maka tenke halo ema sarani ida bele la’o ba to’o iha Maromak. Liu-husi Ahu-kudesan ne’ebé ema simu, sinál katak ema hetan fali dalan ba moris loos. No sinál ahu-kudesan ne’ebé tau iha ema nia reinto’os atu hatudu katak ema hetan fali verdade kona-ba moris.
Dom. Virgílio Cardeal ne’e infroma, sarani tomak mai hamutuk loke kuarsamu ho sinzas ne’ebé simu daudaun, atu hatudu katak iha loron 40 nia laran hanesan sarani hotu-hotu la’o hamutuk. Iha tempu kuarezma sarani ida-idak mós simu konvite atu sa’e ba Maromak nia foho hodi husik buat mundu nian , para bele kontempla Maromak nia hakarak.
Dom. Virgílio Cardeal esplika, orasaun, ezmola no jejúm lori ema atu hatene lolos realidade moris nian. Iha orasaun lori ema fila ba Maromak katak fila ba ema nia huun. Ezmola ka karidade lori ema atu hatene katak ema moris hamutuk ho ema seluk iha sosiedade ida, no jejúm lori ema ba hatene liután kona-ba nia an.
Kuarezma hanesan katak Dom. Virgílio Cardeal, momentu importante iha moris fiar sarani Katólika nian. Tanba iha tempu kuarezma mak sarani ida-idak hahú hanoin ho nia frajilidade tomak atu fila ba Maromak. Kuarezma mós bolu atensaun ba ema ida-idak atu haree ba nia moris, haree besik liu tan buat esensial no importante sira ba moris.
Dom. Virgílio Cardeal Iha kuarezma mak ema sarani hili dalan atu fila ba Maromak liuhosi dalan konversaun, tamba ne’e tempu kuarezma ema ida-idak sei loke nia fuan no tilun atu iha pasiénsia hodi rona Maromak Nia konvite ba dalan loos, dalan salvasaun nian.
Liu husi omilia Dom. Virgílio Cardeal , afirma karta pastoral santu padre Papa Francisco nian dehan, katak kuarezma hanesan retiru ida ba sarani tomak, iha momentu hadera-an ne’e uma kreda konvida sarani tomak atu la’o hamutuk.
Iha mensajen Papa Francisco nian mós hateten katak iha kuarezma la’ós atu sura ema ida-idak nia susesu, maibé la’o hamutuk nu’udar komunidade, nu’udar sarani. Moris hamutuk influénsia malu, la’o hamutuk atu enkoraja malu, no motiva malu nu’udar Sarani, atu hetan forsa la’o hamutuk tamba hotu-hotu la’o hamutuk ba finalidade ida.
Kada tinan ema sarani fiar na’in hotu selebra kuarezma, hotu-hotu hatene oráriu sira kona-ba kuarezma nian, maibé tuir Dom Virgilio katak, la’ós fasil atu ema ida-idak moris tuir ho lolos tan ne’e ba tinan ida-ne’e santa kreda konvida atu hotu-hotu la’o hamutuk, enkoraja malu atu moris tuir santa kreda nia ukun fuan.
Ema hotu ne’ebé hanaran an sarani fiar na’in, aproveita tempu forte ida ne’e ba ida-idak nia konvensaun, hodi hatene hateke ba leten as ba, ho orasaun atu liberta husi hanoin sira ne’ebé haree de’it ba rai hodi la fó tempu ba Maromak.
Remata Omilia Dom. Virgílio Cardeal hatete Sentidu Sinzas maka, selebrasaun Kuarta-Feira Sinzas mak kose ahu-kudesan ho sinál krús iha sarani sira nia reinto’os. Ahu-kudesan sinál rai-rahun ne’ebé tuir ema katóliku sira-nia fiar katak Maromak halo ema hosi rai no sei fila fali ba rai.(Asesu Youtube/Facebook https://www.facebook.com/Media1Timor Media ONE Timor)
Ita nia komentariu konaba post ne'e.