(Reportajen Asisten Editor Jacinto Caet)
DILI (Media ONE Timor) — Ajensia Estados Unidus Amérika ba Dezenvolvimentu Internasionál (USAID) hamutuk ho Organizasaun Naun Governamentál (ONG), ualu halo lansamenstu ba sira nia rezultadu Estudu Peskiza tinan 2022 nian, hanesan parte ida husi USAID-Timor-Leste nia atividade ONG Advokasia ba Governasaun Di’ak hodi halibur evidensia ba apoia polítika advokasia iha sira nia área.
ONG Ualu ne’ebé USAID apoia mak, Assosiasaun Defensensia Timor-Leste (ADTL), Belun, Community Based Rehabilitation Network Timor-Leste (CBRNTL), Fundação Hafoun Timor-Leste (FHTL), Programa Monitorizasaun ba Sistema Judisiáriu (JSMP), Many Hands One Nation (MAHON), Mata Dalan Institute (MDI), Programa Spesifiku fo Prioridade ba Ema Kiak (PROSPEK).
Tuir Diretora Misaun USAID, Zema Semunegus, hatete, husi fahe sira nia rezultadu peskiza ho parseiru governu parseiru xave sira, ONG sira espera atu hametin sira nia parseria iha prosesu elaborasaun polítika no fornese vizibilidade ne’ebé boot liu ba nesesidade no prioridade sidadaun sira nian ne’ebé sira reprezenta.
Peskiza bazeia ba evidénsia fundamental tebes hodi dezenvolve advokasia ida ne’ebé susesu, permiti organizasaun sira hatene rezultadu saida mak sira hakarak atu promove iha sira nia advokasia no ajuda sira atu hatene diak liu tan motivasaun sidadaun sira nian, dezafiu sira no eleva pontu sira ne’ebé bele fo’o resultadu pozitivu.
“Hau kontente tebes ba lansamentu Research products, ne’ebé ami nia parseiru ONG na’in-8 halo, husi peskiza ida ne’e, hola parte iha atividade USAID nian ba ONG advokasia Governasaun di’ak, atividade ninia durasaun ba tinan 5, komesa husi fulan Agustu 2020 to’o fulan Agustu 2025, ho nia total orsamentu hamutuk dolar amerikanu 9.5 miloens,” nia dehan iha Otel Timor, Kinta 30/06/2022.
Nia sublina, husi USAID kontente tebes ba lansamentu ida ne’e, tanba USAID nia parseiru sira iha kapasidade atu hala’o peskiza ida ne’e, no peskiza ida ne’e sei informa ba sira nia advokasia ba sira nia konstituante sira.
“Ami komesa halo agora ho parseiru ONG sira halo aprezentasaun ba ita nia Governu no membru Parlamentu Nasionál ne’ebé mak atende, entaun agora sira fahe deskobrementu husi sira, atu nune’e bele fornese informasaun ba Governu hodi bele haree.
Husi ne’e ami sei kontinua serbisu hamutuk ho parseiru ONG sira ne’e, hodi kontinua informasaun sira ne’e, no bele ajuda sira hodi bele halo advokasia ba mudansa serbisu sira ne’ebé mak Governu TL fornese ba sidadaun sira,” nia hakotu.
Iha fatin hanesan Diretor Ezekutivu ADTL, Cezariu da Silva hateten, parte Asosiasaun Defisiensia nian foku liuba setor edukasaun, atu fornese servisu sira asesu EhD nian ba asesu edukasaun to’o iha faze universidade nian.
“Liu husi peskija ida ne’e, ami nia foku liu husi investimentu iha area setor edukasaun ba EhD nia asesu ba iha munisipiu sira, objetivu prinsipal husi peskija ne’e atu buka hatene no esperensia asesu EHD ne’ebe oportunidade sira, liu-liu ba manorin na’in sira iha eskola atu bele Responde ba EHD”, tenik nia. (Asesu YouTube Facebook Media One Timor)
Ita nia komentariu konaba post ne'e.