Xanana Sei Hatan Perkupasaun Forma Governu, Komparasaun Votus CNRT Tu’un Liu Iha Baucau

MEDIAONETIMOR-Hó Prezidente Partidu Kongresu Nasionál Rekonstrusaun Timor-Leste (P-CNRT), Kay Rala Xanana Gusmão nia silensiu desde loron 23 Jullu 2017, hafoin remata iha eleisaun parlamentar 2017 nian, sai perkupasaun ba timoroan. Liu-liu ba lider Pártidaria sira ne’ebé hakat ba uma fukun Parlamentu Nasional.

Maibé perkupasaun hotu-hotu nian ne’e, P-CNRT ne’ebé ho nia motto “Liberta a Pátria, Libertamos o Povu,” no diferente kadeira ida husi Partidu Fretilin, 23, ba P-CNRT kadeira 22 ne’e sei responde iha Konferensia Nasionál extraordinariu ne’ebé P-CNRT sei hala’o iha Sentru Konvensaun Dili (CCD) hahu, Sesta to’o Dominggu, (04-06/08/2017).

Bazeia ba observasaun Media ONE Timor iha maizu menus tuku 14.30 otl, Sesta, (04/08/2017) nota katak, iha CCD nakonu hó silensiu. Iha jardim nakonu hó kareta no Polisia Nasional Timor-Leste (PNTL) hamrik hó portaun no odataman. Laiha membru ida maka hetan lao ain halo movimentu iha jardim CCD nia laran.

“Hau ho motor lao halai hateke hela ba CCD laran. Laiha jornalista nasional no internasional. Maibé ida husi membru Polisia tranzitu hateke konaba hau nia kartaun, “Ssssttt,” hodi lori liman haruka fila ne’eba no labele tama,” hateten jornalista, João Bernardino.

Tuir  ajenda ne’ebe maka Media One Timor, asesu husi situs sosiais sira haktuir katak, konferensia ne’ebe realiza hosi CNRT atu halo konsolidasaun ba partidu CNRT em-ralasaun ho rezultadu eleisaun parlamentar foin lalais ne’e.

Iha abertura Prezidente Partidu Kay Rala Xanana Gusmão sei halo diskursu ho karakter fó liña orientasaun ba kuadrus polítiku CNRT ne’ebé partisipa konferensia inklui militante, simpatizante no povu doben Timor kona-bá dezafiu no suseisu ne’ebé maka CNRT hetan hosi eleisaun lejislativa.

Iha konferensia nasionál ne’e mós lideransa partidu CNRT nasionál sira sei relata kona-bá sira nia kontribuisaun servisu inklui rezultadu ne’ebé mak atinji ona iha eleisaun 2017.

Hafoin ne’e, iha konferensia nasional ne’e sei desidi ka hakotu pontu sira hanesan tuir mai ne’e; posizaun CNRT ba rezultadu ne’ebe maka hahoris ona hosi eleisaun, posisaun CNRT ba formasaun governu entre koaligasaun ou oposizaun, desidi politika atu reforsa servisu partidu CNRT. Bele mós sei exklui estruktura partidu ne’ebe konsidera laiha kapasidade hodi halo servisu.

No ikus liu maka fó mensajem agredesimentu ba povu Timor-Leste ne’ebé deposita ona konfiansa ba CNRT iha eleisaun lejislativu.

Konferensia Nasionál extraordinariu ne’e taka ba públiku, inklui mídia. Sira ne’ebé sei partisipa iha konferensia ne’e maka mai hosi, estruktura Partidu CNRT iha; munisipiu, nasional no konsellu politika nasional-CPN ho estruktura konsellu Diretiva nasional-CDN ho nia membru sira.

Komparasaun Votantes CNRT nian 2012 hó 2017

1. Munisipiu Aileu iha 2012 votante hamutuk 10,785 no 2017, 10,239, signifika municipiu Aileu iha tinan 2017 menus votante 546 hosi rezultadu 2012 nian.
2. Ainaro, 2012, votante iha 9.239 iha tinan 2017 sae’ ba 9.285, signifika aumenta 47 votante iha 2017.
3. Baucau, 2012, votante 12.458, iha 2017 tun ba 6.208, signifika CNRT lakon votus iha tinan ida ne’e hamutuk 6.250.
4. Bobonaro, 2012, votante hamutuk 15.285 entertantu 2017, sa’e ba 15.288 signifika aumenta ema nain 3 iha tinan ida ne’e.
5. Covalima, 2012 iha votante 8.644 no 2017 sa’e ba 9,172, signifika aumenta 528 votu iha tinan ida ne’e.
6. Dili, 2012 iha votante 45.456 maibé iha 2017 votante sa’e ba 45.701, signifika aumenta votu 245.
7. Ermera, 2012 iha votu 19.354 no 2017, sa’e 19.577, sa’e 532 votu.
8. Lautem, tinan 2012, votu iha   5.799, agora 2017 sa’e ba 7.673, signifika aumenta 2.074.
9. Likisa, tinan 2012, votu iha 11.996, iha 2017 tun ba 10.987, signifika lakon 1009 votu.
10. Manatuto, 2012 CNRT hetan votu 9.242 no 2017 tun ba 7.761 lakon 1481 votus.
11. Manufahi, 2012 iha votu 7.006 ba 2017 sa’e ba 7.637 signifika aumenta 631 votu.
12. Oekusse, iha 2012 CNRT hetan votu 12.087, maibé 2017 tun ba 10.490 signifika lakon votu 1.597.
13. Vikeke, iha 2012 CNRT hetan votu 5.567 no 2017 sa’e ba 6.609, signifika aumenta 1.042 votu.

No iha Estránjeiru foin maka partisipa iha tinan 2017 maka hanesan; Aústralia iha 2017 hetan 86, Korea do Súl 52, Portugal 48 no Reino Unido 32.

Hosi rezultadu ne’e maka bele rezumu katak, total votus ne’ebé CNRT hetan iha tinan 2012 hamutuk 172.908 votu no iha tinan 2017 tun ba 167,345 votus hó nune’e iha eleisaun lejislativa tinan ida ne’e CNRT lakon votu hamutuk 5.563 votu.(tatoli/Suzana Cardoso)