MEDIAONETIMOR-Konstrusaun Hospital Rejional Baucau ne’ebé deskonfia halo manipulasaun, Ministeriu Públiku sei hetan desizaun ba kazu ne’e iha Loron 15 Fulan Setembru tinan ne’e.
“Iha loron 15 Fulan Setembru 2017 mós iha kazu ba konstrusaun Hospital Rejional Baucau nian. Arguidu balu mós sei hetan desizaun tuir mai. Informa mós kazu akontese iha Seisal ne’ebé hein hela partisipasaun hosi PNTL. Aliende ne’e kazu balu akontese iha Quelicai, Baucau ema asaltu hodi tama foti sasan iha Igreja laran.”
Lia fuan hirak ne’e hato’o hosi Prokurador Jeral, José da Costa Ximenes ba Jornalista sira hafoin remata enkontru mensal ho Presidente da Repúblika (PR), Francisco Guterres Lú Olo iha salaun Palacio Presidencial Nicolau Lobato.
Aliende ne’e ba PR Lú Olo, Prokurador José mós informa konaba; aktividade balun hetan suspende tanba ferias judisial no majistradu. Maibé, ba kazu urjenti nafatin funsiona. Hanesan; sumariu, primeiru interogatoriu no mós ofisial da justisa no tribunal nian.
Prokurador José relata parte ezekusaun nian, konaba ezekusaun ba pena kondenadu João Cançio Freitás ne’ebé kumpri tiha ona desizaun hodi ba komarka Gleno iha Loron 26 Jullu 2017.
Hateten Prokurador José, parte seluk informa ba PR Lú Olo konaba kondenadu; Agostu Inglesh nu’udar funsionariu Públiku hosi Ministerio Obras Públicas no Eis Sekretariu Ministerio Obras Públicas, Domingos Caerro ho tribunal deside tinan 3 fulan 6 iha Prizaun.
Rona tiha informasaun hirak ne’e Prokurador José hateten, PR Lú Olo preokupa teb-tebes. Liu-liu ba kazu korupsaun. Nune’e PR Lú Olo husu Prokurador Jeral para bele kontinua mantein pozisaun hodi prosesu krime sira ne’ebé iha lao ba oin liu tan.
“Ministeriu Públiku tenki mantein nafatin prisipiu igualidade no prinsipiu legalidade. Enkuantu sala dehan sala. Tanba, ema hotu iha lei nia oin hanesan. Labele sidadaun bai-bain tenki prosesa, maibe sidadaun ne’ebe okupa kargu ne’e tranzitu deit. Labele dehan ne’e hanesan mortal. Laos tanba nia okupa kargu ne’e maka pozisaun. Maibé sala ne’ebé maka nia halo ne’e mak ita prosesa.(Reportájem Deonisio da Cruz)
Ita nia komentariu konaba post ne'e.