DÍLI (Media ONE Timor) – Atu evita moras matan iha Timor-Leste (TL) ne’ebé tinan-tinan aumenta ba bei-beik maka Ministeriu Saúde (MS) lansa programa estratejiku ba matan hodi reforsa atendementu pasiente matan nian.
“Programa ne’e rasik iha kapasitasaun hodi reforsa liu tan atividade iha Hospital Nasional Guido Valadares (HNGV), sentru no postu saúde. Inklui, hospital munisipal sira hodi bele evita moras matan iha TL.”
Lia fuan ne’e hato’o husi Ministra Saúde, Odete Belo iha serimonia despedida ho Reprezentante Organizasaun Saúde Mundial (OMS), dr. Rajesh Pandav ne’ebé remata ona nia mandatu iha TL halao ho suseisu iha semana daruak Fulan Setembru 2020.
Durante tinan 10-resin, dr. Rajesh Pandav hala’o nia kna’ar iha TL nu’udar reprezentante OMS, fo mós atendementu ba pasiente matan. Nune’e Ministra Odete lori povu nia naran hato’o obrigadu ba dedikasaun ne’e.
Ministra Odete esplika liutan, TL apresia ho prejensa dr. Rajesh nian. Tanba, husi prezensa ne’e kontribui ho diak kualidade saúde TL, ikus mai atinji duni rejultadu ne’ebé diak no fo impaktu diak tebes ba saúde publiku TL nian.
“Hau lori Ministeriu Saúde nia naran hato’o agradesementu wain ba dr. Rajesh Pandav nia prezensa. Tamba, bele kontribui ona area saúde iha ita nian rain. No nia prezensa fo impaktu bo’ot ba progresu dezemvolvimentu ita nia saúde públiku iha TL,” katak MS Odete hodi hatutan.
Maske nune’e servisu ba progresu moris saudavel tenki lao ba oin. Programa estratejiku matan sai hanesan atividade ne’ebé presiza servisu diak liu tan ho liu husi kapasitasaun ba pesoal saúde sira.
Katak MS Odete, iha atividade ne’e rasik mak iha servisu no kapasitasaun ba pesoal saúde sira. Hanesan; emfermeiru, doutor no seluk tan. Iha tempu hanesan, haruka mós sira ba eskola hodi kapasita diak liu tan sira nia kapasidade iha saúde matan nian.
“Liu husi programa ne’e diak tebes. Tamba ita bele vita ou reduz kausa moras matan no kauza husi difiesiensia matan iha ita nia nasaun TL,” esplika Ministra Saúde ne’ebé mai husi Partidu Fretilin ne’e. Planu estratejiku matan nian ne’e, esi exekuta iha tinan 2021.(Javelino da Silva)
Ita nia komentariu konaba post ne'e.