(Reportagem Jaime Salsinha/Asistente Editor Jacinto Caet)
DILI (Media ONE Timor) – Governu laiha planu hodi fó servisu ba foinsa’e sira, ekonomia obriga joven barak deside ba servisu iha nasaun avansadu.
“Ita iha rekusu, hanesan mina. Maibé ita la iha kampu traballu. Formandu no estudante finalista sira barak mak ba rai liur. Kestaun tanba ita la fó oportunidade ba sira hodi servisu rasik iha sira nia rai laran. Ikus sira tenke ba rai liur”.
Kestaun ne’e hato’o hosi Dekanu Fakuldade Siensia Sosiais, Camilo Almeida ba Média ONE Timor iha nia knaar fatin Kampus Kaikoli, Kuarta, (22/06/2022).
Manorin ne’e hateten, ema hotu kestiona joventude barak buka servisu iha estranjeiru mesak estudante finalista. Durante tinan 20 ona governu la kria kampu traballu hodi hamenus dezempregu iha rai-laran.
Ne’e duni Camilo husu governu liuhusi Sekretáriu Estadu Formasaun Profisional Empregu (SEFOPE), tenke esforsu mak’as buka tuir númeru dezempregu iha rai-laran.
Katak dekanu ne’e, realidade TL hasoru problema ekonomia. Salariu baziku minimu liu. Kada fulan iha de’it 150 USD. Osan ne’e hola de’it foos, mina la hola ona. Maka, oinsa atu sustenta moris lorloron. Sujere tenke hasa’e salariu minimu ba to’o 300 USD.
Alternativa seluk katak Camilo, SEFOPE kada tinan tenke anunsiu ba públiku total dezempregadu ho idade produtivu no la produtivu. Aliende ne’e, tenke kria kampu traballu. Nune’e maka sei minimiza joven sai ba rai-liur.
“Traballador sira ne’ebé ba servisu iha Korea no Australia fulan neen de’it sira bele halo uma mutin. Maibé funsionariu balun servisu hahú iha tinan 1999 to’o agora halo uma de’it moos sei araska, satan hola rai iha Dilil. Ne’e kestaun seriu ne’ebé presiza haree”, tenik Camilo.
Dosente ne’e hateten, Timoroan barak ba liur, maibé investidor mak’as husi estranjeiru mai aproveita TL nia dollar, prezisa hatene empregadu Timoroan na’in hira mak investe. Labele dehan ema barak mak investe. Ne’e servisu ne’ebé laloos.
Loja Xina Dili laran nia traballador maioria ema Indonezia, nune’e haktuir Camilo, Governu tenke esforsu mak’as. Kontinua fó formasaun ba joven sira. Investe ba capital. Liliu loke kampu traballu.
“Atu garantia ida ne’e, governu tenke esforsu. Liliu SEFOPE. Governu tenke oferese kapital ba emprezariu sira hodi kria kampu traballu. Presiza dadus fó formasaun bengkel hadia motor mai husi postu adminitativu nain hira. No investe kedas capital. Ezemplu 10.000 USD, fila ba nia aldeia kria kampu traballu ba nia maluk sira seluk. Depois Governu kontrola”, komenta Camilo hodi fó hanoin.
Exempli seluk dehan Camilo, atu garantia kualidade servisu, tenke selu tuir estandar salariu nian. Selae ema soldadura ba ku’u fali ai-fuan no kuda ai-funan iha Australia, hafoin Australia importa fali aifunan mai Timor-Leste.
“Tanba ita haree imagen no le’e jornal, maioria joven sira hakarak ba hotu rai liur. Husik hela kataus no ferik idade 60 sira mak iha ne’e. Impossible ita atu lori nasaun ne’e ba di’ak. Nune’e husu ba Governu tenke loke kampu traballu no hasa’e salariu traballador sira nian”, tenik Dosente Camilo ne’e.(Asesu YouTube/Facebook Media One Timor)
Ita nia komentariu konaba post ne'e.