Mudansa Klimatika Sobu Uma Kain 172 no Ponte Rua

(Reportjan Asisten Editor Marcelino Tomae/Editora Suzana Cardoso)

DILI (Media ONE Timor) — Mudansa klimátika halo udan boot ne’ebé akontese iha Munisípiu; Vikeke, Lospalos no Munisipiu Kovalima iha loron 30 Juñu 2022, halo uma kain 172 no ponte rua hetan estragus total.

“Mundansa klimátika iha fulan Juñu, munisípiu tolu mak sai vitíma hodi enfrentra situasaun ne’ebé grave tebes”, deklara Sekretáriu Estadu Protesaun Sivil (SEPS), Joaquin José Gusmão dos Reis Martins   ba Jornalista iha nia kna’ar fatin Kaikoli Dili, Sesta, (01/07/2022).

Dadus provizoriu ne’ebé mak relata ona SEPS Juaquin hateten, Munisípiu Vikeke Postu Administrativu Vikeke Vila; Suku Uma Lete hamutuk uma kain 50 no uma kraik uma kain haat maka hetan estragus.

Dehan SEPS Juaquin, iha postu administrativu Watulari; Suku Makadiki uma kain ida. No postu administrativu Watu Karbau iha Suku Wani hamutuk uma kain 25 maka sai vitíma ba inundasaun loron ida ne’e nian. Nune’e, provizoria totál uma kain 172 iha Vikeke mak hetan estragus.

SEPS Juaquim haktuir tan, akontesementu ne’e la’os estraga de’it komunidade nia uma. Maibé, halo moos ponte entre Watulari ba Watukarbau kotu. No mós ponte Maluru ligasaun Vikeke villa ba iha Postu Administrativu Watulari.

Aliende munisípiu parte kosta Sul; Lospalos no Vileke katak SEPS Joaquim, udan boot moos akontese iha Munisipiu Manufahi no Suai hodi hamosu inundasaun. Maibé, vitíma entre Munisípiu Vikeke ho Suai no Postu Administrativu Manufahi ne’e, SEPS   hamutuk ho parseiru sira iha ona fatin akontesementu hodi fó apoiu emerjensia ba vitíma sira.

Juaquim hatete tan, iha Munisípiu Suia postu administrativu Kovalima, iha familia haat mak hetan estragus. Sira evakua ona ba eskola vokasional Suai Luru. No mós mota ida atu tama ba Suai, besik madre sira nia hela fatin mak mota tama mak’as to’o hapara tiha movimentu karreta.

Aliende ne’e SEPS Juaquin moos simu informasaun provizoriu husi parseiru sira katak, ponte ida iha Suai komesa amiasadu atu besik kotuk. Maibé ekipa SEPS ho parseriu sira sei halo konfirmasaun dadus ho detallu liutan.

Iha Lospalos tuir SEPS Juaquin, sira seidauk hetan dadus konkretu ne’ebé sai hanesan afetadu ba akontesementu udan boot ne’e. Maibé tuir informasaun ne’ebé SEPS asesu husi entidade relevante katak rai halai taka tomak estrada iha Munisípiu Lospalos nian.

Daudaun ne’e SEPS hamutuk ho parseiru sira Juaquin hatutan, tuun ona ba fatin akontesementu hodi fó apoiu ba família sira ne’ebé mak hetan estragus hosi udan boot loron 30 Juñu 2022 ne’e. Maske nune’e, iha Lospalos to’o loron 01 Jullu 2022, udan sei mak’as iha parte kosta Suul ninian.

“Ita hotu hatene katak mudansa klimátika ne’e muda duni. Tanba uluk ita nunka haree Fulan Juñu sei udan. Maibé tinan 2022 ne’e tama ona Fulan Juñu udan sei tuun nafatin. Nune’e, avizu nafatin ba komunidade, liliu sira ne’ebé mak hela iha fatin risku ba dezastre, atu tau atensaun ba autoridade munisípiu sira”, SEPS Juaquin informa hodi hatutan.

Kuandu udan komesa boot ona besik oras ida liu, idaidak ho voluntariamente tenki evakua sai husi hela fatin, hodi salva aan no salva dokumentu sira ba fatin seguru.

Hatan Jornalista konaba apoiu, katak SEPS Juaquin, normalmente servisu hamutuk ho autoridade lokál no mós parseiru sira hodi fahe hahan hanesan foos, supermi, laterias, susu been ba labarik. Aliende ne’e apoiu seluk mak lona, sasan dapur balun, muskuteiru ba labarik sira hodi hodi vitima sira aguenta iha situasaun emerjensia nia laran.

“Tinan-tinan ita sempre tau orsamentu ba ida ne’e. No mós ita sei iha stok material. Agora ita uza hodi apoiu ba vitíma sira . Foos iha armajen mós sei iha. Ligasaun ho orsamentu ba tinan 2022 puur volta 300,000,000.00 USD hodi prepara ba munisípiu hotu-hotu”, hatete SEPS Juaquim. (Asesu Youtube/Facebook https://www.facebook.com/Media1Timor Media ONE Timor)